Հալեպի շտապօգնության մարմինը նյութական օժանդակություն է տրամադրել կարիքավոր հայերին
1 րոպեի ընթերցում
![Հալեպի շտապօգնության մարմինը նյութական օժանդակություն է տրամադրել կարիքավոր հայերին](http://armenpress.am/resized/480/static/news/b/2015/08/815818.jpg)
ԵՐԵՎԱՆ, 20 ՕԳՈՍՏՈՍԻ, ԱՐՄԵՆՊՐԵՍ: Հալեպի շտապօգնության մարմինն օգոստոսի 19-ին շարունակել է կատարել իր առաքելությունը՝ նյութական օժանդակություն տրամադրելով կարիքավորներին: Շտապօգնության մարմնի կամավոր աշխատակիցները նախապես պատրաստված համապատասխան թղթածրարները տրամադրել են կարիքավոր հայերին: Այս մասին «Արմենպրես»-ը տեղեկացավ «Բերիո լուրեր» ֆեյսբուքյան էջից:
Հալեպում վերջին օրերի ընթացքում իրավիճակը համեմատաբար հանգիստ է: Թեպետ մերթ ընդ մերթ կրակոցների ձայներ են լսվում, սակայն, ընդհանուր առմամբ, հայաշատ թաղամասերում միջադեպեր չեն գրանցվել: Քաղաքում թեև որոշակի ընդհատումներով, սակայն վերականգնվել է ջրի և էլեկտրաէներգիայի մատակարարումը:
Հալեպ քաղաքը 2012թ. ամռանից ի վեր հայտնվել է կառավարական ուժերի և զինված տասնյակ խմբավորումների բախումների թիրախում: Բախումներն այնտեղ մինչ օրս շարունակվում են: Քաղաքի արևմտյան թաղամասերը գտնվում են կառավարական ուժերի, իսկ արևելյան թաղամասերը` զինված խմբավորումների հսկողության տակ: