3 րոպեի ընթերցում
ԵՐԵՎԱՆ, 29 ՀՈւԼԻՍԻ, ԱՐՄԵՆՊՐԵՍ: Տավուշի մարզի սահմանամերձ Բերդի նորաբաց բժշկական կենտրոնում արդեն երկու տղա և մեկ աղջիկ է լույս աշխարհ եկել։ Նրանց մայրիկների երջանկությանը գումարվել է նաև արտակարգ պայմաններում, ամենաժամանակակից սարքավորումներով ու հնարավորություններով հագեցած կենտրոնում բժշկական օգնություն ստանալու ուրախությունը։
Ինչպես «Արմենպրես»-ին տեղեկացրին ՀՀ առողջապահության նախարարությունից, հիվանդանոցի բացումից հետո անցած չորս օրվա ընթացքում տարբեր բաժանմունքներում 25 հիվանդ է ընդունվել։ Վիրաբուժական բաժանմունքի բոլոր 5 հիվանդները հոսպիտալացվել են զանազան կոտրվածքներով։ Թերապևտիկ բաժանմունքում այսօր բուժում է ստանում 8 հիվանդ` սուր կոնորար սինդրոմ, թոքաբորբ, քրոնիկ երիկամային անբավարարություն, սրտի իշեմիկ հիվանդություն, ստենոկարդիա և այլ ախտարոշումներով։ Իսկ մանկական բաժանմունքում բուժում է ստանում 3 փոքրիկ` սուր շնչառական հիվանդություն, սուր ստենոզոլարինգոտրախեիդ (կեղծ կրուպ) և բրոնխիտ ախտորոշումներով։
Բոլոր հիվանդներն անցել են անհրաժեշտ հետազոտությունները։ Բերդի բժշկական կենտրոնից տեղեկացրել են, որ ինչպես ռենտգեն, սոնոգրաֆիական և արդիական մյուս սարքավորումները, այնպես էլ լաբորատորիան ամբողջ ծավալով օգտագործվում են։ Այս պահի դրությամբ ծանր հիվանդներ չկան։
Բերդի նորակառույց բժշկական կենտրոնի բացումը, որին մասնակցել է ՀՀ Նախագահ Սերժ Սարգսյանը, տեղի է ունեցել հուլիսի 24-ին: Բերդի բժշկական կենտրոնը հագեցած է ժամանակակից բժշկական սարքավորումներով, այդ թվում՝ բարձր արտադրողականություն ունեցող բազմաֆունկցիոնալ ռենտգեն համալիր, եռաչափ ուլտրաձայնային հետազոտման սարք, որը կարող է իրականացնել նաեւ սրտի եւ անոթների հետազոտություն, սպիրոմետր՝ ծրագրային փաթեթով, վիրասրահի համար նախատեսված վիրահատական LED լուսատու, բազմաֆունկցիոնալ վիրահատաան սեղան, ինչպես նաեւ ժամանակակից լաբորատոր սարքեր: Բերդի բժշկական կենտրոնի մասնագիտական ուղղվածությունը հաշվի առնելով՝ որպես շտապ եւ անհետաձգելի բժշկական օգնություն մատուցող կենտրոն, տրամադրվել է նաեւ թոքերի արհեստական օդափոխության սարք, դեֆիբրիլյատոր՝ սինխրոնիզացիայի հնարավորությամբ: Կենտրոնը հագեցած է նաեւ բժշկական կահույքով եւ պարագաներով: