Դամասկոսի մերձակայքում և բնակելի թաղամասերում հրասանդներ են ընկել
2 րոպեի ընթերցում
![Դամասկոսի մերձակայքում և բնակելի թաղամասերում հրասանդներ են ընկել](http://armenpress.am/resized/480/static/news/b/2015/07/813453.jpg)
ԵՐԵՎԱՆ, 27 ՀՈՒԼԻՍԻ, ԱՐՄԵՆՊՐԵՍ: Դամասկոսի շրջաններում ու բնակելի թաղամասերում հուլիսի 27-ին հրասանդներ են ընկել, ինչի հետևանքով երկու տասնյակից ավելի մարդ է տուժել: Ինչպես հաղորդում է «Արմենպրես»-ը, վկայակոչելով սիրիական ՍԱՆԱ գործակալությունը, ոստիկանության տեղեկացմամբ՝ «Ջեյշ ալ Իսլամ» ահաբեկչական խմբավորումը երեք հրասանդներ է նետել Զաբլատանի շրջանի բնակելի թաղամասերի ուղղությամբ, ինչի հետևանքով մեկ զոհ և 13 վիրավորներ են գրանցվել: Մեկ այլ հրասանդ ընկել է Դամասկոսի «Շերատոն» հյուրանոցի շրջակայքում, որից մեկ մարդ վիրավորվել է: Եվս մեկ հրասանդ ընկել է քրիստոնեական Բաբ Թումա թաղամասում՝ պատճառելով նյութական վնասներ:
Տասից ավելի հրասանդներ ընկել են Դամասկոսի Հարասթա արվարձանում՝դառնալով 2 մարդու վիրավորվելու պատճառ: Բացի մարդկային վնասներից, նյութական վնասներ են կրել մերձակայքում գտնվող խանութները, մեքենաները, տները, բնակիչների ունեցվածքը:
Հրթիռներ են ընկել Հալեպի Նիյալ շրջանում, ինչի հետևանքով 5 մարդ է վիրավորվել, նաև նյութական վնասներ են արձանագրվել: Հրթիռններն արձակել է «Ջաբհա ան Նուսրա» խմբավորումը՝ Սեյիդ Ալի թաղամասից:
Առավոտյան պայթյուններ են որոտացել Հասաքեի նահանգում գտնվող Ղամիշլի քաղաքում: Մահապարտ-ահաբեկիչն ինքն իրեն պայթեցրել է Ալայա թաղամասում, ինչի պատճառով 5 մարդ է վիրավորվել: Ահաբեկիչները պայթուցիկ սարքավորում են գործի դրել քաղաքի կենտրոնական Կուրնիշ փողոցում՝ վիրավորելով 3 մարդու:
Սիրիական բանակն արդեն չորս տարի անընդմեջ պայքար է մղում տասնյակ զինված խմբավորումների դեմ՝ փորձելով երկրում վերականգնել կայունությունն ու անվտանգությունը: ՄԱԿ-ի տվյալներով՝ սիրիական հակամարտության զոհերի թիվը գերազանցել է 220 հազարը: