Քրդական ուժերը Թուրքիայից պահանջել են դադարեցնել քրդական շրջանների ռմբակոծությունը
1 րոպեի ընթերցում
![Քրդական ուժերը Թուրքիայից պահանջել են դադարեցնել քրդական շրջանների ռմբակոծությունը](http://armenpress.am/resized/480/static/news/b/2015/07/813451.jpg)
ԵՐԵՎԱՆ, 27 ՀՈՒԼԻՍԻ, ԱՐՄԵՆՊՐԵՍ: Թուրքական ուժերը պետք է անհապաղ դադարեցնեն քրդական շրջանների ռմբակոծությունը: Ինչպես հաղորդում է «Արմենպրես»-ը, վկայակոչելով արաբական լրատվամիջոցները, նման պահանջով հանդես է եկել Սիրիայում քրդական ազգային պաշտպանության ուժերի ղեկավարությունը: Փաստաթղթի մեջ նշվել է, որ թուրքական բանակը «Իսլամական պետության» ահաբեկիչների դիրքերը ռմբակոծելու փոխարեն մի քանի անգամ ռմբակոծել է Քոբանիի մերձակայքում քրդական և Սիրիայի ազատ բանակի դիրքերը:
Տեղեկություններ են հաղորդվել, որ Թուրքիան յոթ տանկերով ռմբակոծել է քրդական Զուր Մաղար գյուղը:
Իր հերթին Դամասկոսը մտահոգված է թուրք-սիրիական սահմանին տեղի ունեցող իրադարձություններով: Սիրիայի արտաքին գործերի փոխնախարար Ֆեյսալ ալ Միկդադը հայտարարել է, որ Թուրքիան օգտագործում է ԻՊ-ի սպառնալիքի առիթը, որպեսզի հարձակվի սիրիական տարածքի վրա:
Ռազմական փորձագետները նույնպես մտավախություն ունեն, որ այդ կերպ թուրքական կողմը ցանկանում է իրականացնել Սիրիայի հյուսիսում, այսպես կոչված, անվտանգության գոտի ստեղծելու իր վաղեմի ծրագիրը: