ԻՊ-ի ահաբեկիչներն իրաքյան քաղաքներից փախուստի են դիմում կնոջ հագուստով
2 րոպեի ընթերցում
![ԻՊ-ի ահաբեկիչներն իրաքյան քաղաքներից փախուստի են դիմում կնոջ հագուստով](http://armenpress.am/resized/480/static/news/b/2015/07/813449.jpg)
ԵՐԵՎԱՆ, 27 ՀՈՒԼԻՍԻ, ԱՐՄԵՆՊՐԵՍ: «Իսլամական պետության» ահաբեկիչները փորձում են փախուստի դիմել իրաքյան Անբարի նահանգի Ռամադի և Ֆալլուջա քաղաքներից: Ինչպես հաղորդում է «Արմենպրես»-ը, վկայակոչելով արաբական լրատվամիջոցները, փախուստի դիմելու լավագույն տարբերակն ԻՊ-ի ահաբեկիչներն իրականացնում են կնոջ հագուստ կրելով: Հիմնականում ուղևորվում են դեպի Հիթ քաղաք, որը գտնվում է Բաղդադից 140 կմ հեռավորության վրա: Զանգվածային փախուստը սկսվել է այն ժամանակ, երբ իրաքյան հատուկ ծառայության ուժերը նրանց քշել են Ռամադիի համալսարանից, որն ահաբեկիչներն օգտագործում էին որպես իրենց գլխավոր շտաբ և հիմնական բազա՝ ահաբեկչություններ նախապատրաստելու համար:
Իսլամում կնոջ հագուստով քողարկվելը համարվում է մեղք:
Իրաքյան աղբյուրների տեղեկացմամբ՝ ԻՊ-ի տասնյակ անդամներ են սպանվել Ռամադի քաղաքի արևելքում տեղի ունեցած բախումների արդյունքում: Սպանված ահաբեկիչների թիվը 30-ի է հասնում: Նրանք սպանվել են Խալիդիայի վրա հարձակման արդյունքում: Մյուս կողմից՝ Ռամադիի արևելքում գտնվող Հասիբա շրջանում 18 դիպուկահարներ են սպանվել, վնասազրեծվել են 44 պայթուցիկ սարքավորումներ:
ԻՊ-ն Մոսուլում երկու մարդու է մահապատժի ենթարկել:
Ավելի վաղ՝ հուլիսի 13-ին, իրաքյան բանակի ղեկավարությունը հայտարարել է Անբարի նահանգի ազատագրման ռազմական գործողությունների մեկնարկի մասին: Իրաքի պաշտպանության նախարարի խոսնակ Յահյա ազ Զուբեյդին նշել է, որ ազատագրման գործողությունները սկսվել են հուլիսի 13-ի առավոտյան՝ ավելացնելով, որ զինված ուժերը, ազգային կամավորական ջոկատները, ոստիկանությունը, Անբարի ցեղախմբերը միասնական պայքարում են «Իսլամական պետության» դեմ:
ԻՊ-ի վերահսկողության տակ է գտնվում նահմանգի 80 տոկոսը: