Իրաքյան ուժերն Անբարում ավարտել են ռազմական գործողությունների առաջին փուլը
1 րոպեի ընթերցում
![Իրաքյան ուժերն Անբարում ավարտել են ռազմական գործողությունների առաջին փուլը](http://armenpress.am/resized/480/static/news/b/2015/07/813136.jpg)
ԵՐԵՎԱՆ, 23 ՀՈՒԼԻՍԻ, ԱՐՄԵՆՊՐԵՍ: Իրաքը հուլիսի 23-ին հայտարարել է Անբարի նահանգում «Իսլամական պետության» դեմ ռազմական գործողությունների առաջին փուլն ավարտելու մասին: Ինչպես հաղորդում է «Արմենպրես»-ը, վկայակոչելով արաբական լրատվամիջոցները, Իրաքի պաշտպանության նախարար Հադեդ ալ Օբեյդին նշել է, որ իրաքյան ուժերը հաջող ավարտել են Անբարի ազատագրման առաջին արշավը:
«Իրաքյան ուժերի հաջողությունն Անբարում այն է, որ կառավարական միասնական ուժերը մտել են նահանգի կենտրոնի՝ Ռամադիի արվարձան»,- նշել է նախարարն՝ ավելացնելով, որ ռազմական գործողությունների երկրորդ փուլը կմեկնարկի մոտ ժամանակներս:
Ավելի վաղ՝ հուլիսի 13-ին, իրաքյան բանակի ղեկավարությունը հայտարարել է Անբարի նահանգի ազատագրման ռազմական գործողությունների մեկնարկի մասին: Իրաքի պաշտպանության նախարարի խոսնակ Յահյա ազ Զուբեյդին նշել է, որ ազատագրման գործողությունները սկսվել են հուլիսի 13-ի առավոտյան՝ ավելացնելով, որ զինված ուժերը, ազգային կամավորական ջոկատները, ոստիկանությունը, Անբարի ցեղախմբերը միասնական պայքարում են «Իսլամական պետության» դեմ:
ԻՊ-ի վերահսկողության տակ է գտնվում նահմանգի 80 տոկոսը: