Կառավարությունում քննարկել են Անկախության տոնի առթիվ կազմակերպվելիք միջոցառումների ծրագրի նախագիծը
1 րոպեի ընթերցում
ԵՐԵՎԱՆ, 14 ՀՈւԼԻՍԻ, ԱՐՄԵՆՊՐԵՍ: Կառավարությունում տեղի է ունեցել Անկախության տոնին նվիրված միջոցառումների նախապատրաստման և կազմակերպման պետական հանձնաժողովի նիստը, որը վարել է վարչապետ, հանձնաժողովի նախագահ Հովիկ Աբրահամյանը: Ինչպես «Արմենպրես»-ին տեղեկացրին ՀՀ կառավարության տեղեկատվության և հասարակայնության հետ կապերի վարչությունից, նիստում քննարկվել է Անկախության 24-րդ տարեդարձի առթիվ կազմակերպվելիք հոբելյանական միջոցառումների ծրագրի նախագիծը: Ծավալվել է մտքերի փոխանակություն, որի ընթացքում ՀՀ նախարարությունների և գերատեսչությունների ղեկավարները ներկայացրել են իրականացվելիք տոնական միջոցառումների ցանկը:
Վարչապետ Աբրահամյանը հանձնարարել է նիստի ընթացքում ներկայացված առաջարկությունների հիման վրա կազմել տոնական միջոցառումների վերջնական ծրագիրը և այն ներկայացնել հանձնաժողովի հաստատմանը: