Մոր և մանկան առողջության թեմայով սեմինարը Երևանում միավորել է ԱՀԿ անդամ 7 երկրների մասնագետների
5 րոպեի ընթերցում
ԵՐԵՎԱՆ, 13 ՀՈՒԼԻՍԻ, ԱՐՄԵՆՊՐԵՍ: «Մոր և մանկան, դեռահասների առողջության պահպանման ազգային ծրագրերի ռազմավարության պլանավորում և արժեքների գնահատում» թեմայով միջերկրային սեմինարը միավորել է Առողջապահության համաշխարհային կազմակերպության եվրոպական տարածաշրջանի յոթ անդամ երկրի 45 մասնակիցների:
Ինչպես «Արմենպրես»-ին տեղեկացրին ՀՀ առողջապահության նախարարության մամուլի ծառայությունից, ՀՀ առողջապահության նախարար Արմեն Մուրադյանը, ողջունելով սեմինարի մասնակիցներին, նշել է, որ մոր և մանկան առողջության պահպանման ոլորտում իրականացվող քննարկումները, մասնավորապես ծախսարդյունավետությանը վերաբերող խնդիրները` խիստ արդիական են: «Հաշվի առնելով, որ այս ուղղությունը պահանջում է մշտական մեծ ծախսեր` մենք, անշուշտ, մեծ տեղ ենք տալիս նման քննարկումներին»,- ասել է Արմեն Մուրադյանը` շնորհակալություն հայտնելով ԱՀԿ եվրոպական տարածաշրջանային գրասենյակին՝ այս միջոցառումը կազմակերպելու համար:
Նա սեմինարի մասնակիցներին մաղթել է արգասաբեր և արդյունավետ աշխատանք` հանուն երեխաների, հանուն մոր և մանկան առողջության:
Սեմինարին մասնակցելու համար Հայաստան ժամանած մասնագետները նշել են, որ մոր և մանկան, դեռահասների առողջության պահպանման ազգային ծրագրերի ռազմավարության պլանավորման և արժեքների գնահատման հիմքերից են Առողջապահության համաշխարհային կազմակերպության եվրոպական տարածաշրջանի «Առողջություն 2020» համապարփակ քաղաքականության դրույթները:
Ներկայացվել են այս քաղաքականության ղեկավարող սկզբունքներն ու առավելությունները: Ընդգծվել է բնակչության առողջության բարելավմանն ուղղված այս ծրագրի` ըստ յուրաքանչյուր երկրի բնակչության առանձնահատկության տեղայնացման, մշակման և ներդրման անհրաժեշտությունը:
ՀՀ առողջապահության նախարարության երեխաների առողջության պահպանման բաժնի պետ Նունե Փաշայանն իր զեկույցում ներկայացրել է մոր և մանկան ոլորտում Հայաստանում գրանցված հիմնական հաջողություններն ու խնդիրները: Նա նշել է, որ 2008թ. հետո ծննդօգնության և երեխայիառողջության պետական հավաստագրերի ներդրման շնորհիվ վերջին հինգ-վեց տարում մոր և մանկան առողջության պահպանման ոլորտում էականորեն բարելավվել է բուժօգնության որակը, նվազել են մայրական և մանկական մահացության հիմնական ցուցանիշները:
Բարեփոխումները նպաստել են նաև բուժաշխատողների աշխատավարձերի ավելացմանը, դեղերով ապահովվածությանը: Աշխատանքներ են տարվել նաև մարզերում մանակական վերակենդանացման ծառայության բարելավման ուղղությամբ:
Նունե Փաշայանն անդրադարձել է նաև նորածնային սկրինինգների արդյունավետությանը, միջազգային կազմակերպությունների հետ ՀՀ առողջապահության նախարարության սերտ համագործակցությանը:
Մասնագետի խոսքով` շարունակում են օրակարգային մնալ մանկաբույժների վերապատրաստման, բուժօգնության որակի բարելավման, հավելյալ ֆինանսավորման հարցերը:
ՀՀ առողջապահության նախարարի տեղակալ Սերգեյ Խաչատրյանը նշել է, որ այս հանդիպման հիմնական նպատակը ծրագրավորման մի նոր գործիքին ծանոթացնելն է։ Դա հնարավորություն է տալիս գործող ծրագրերի ծախսերի կանխատեսումներ անել և ռազմավարական գնահատականներ տալ։ «Այն մշակել են ԱՄՆ-ի փորձագետները, ընդունվել է Առողջապահության համաշխարհային կազմակերպության կողմից։ Մանրամասն կքննարկվեն ծրագրային այս մոտեցման հնարավորությունները և կիրառման ուղիները։ Դրանք նախատեսված են առողջապահական ամբողջ համակարգի, այդ թվում` հանրային առողջապահական խնդիրների լուծման համար»,- ասել է փոխնախարարը` հավելելով, որ մոր և մանկան առողջության պահպանման խնդիրներն ամբողջ աշխարհում առաջնահերթություն են, ուստի գործիքի կիրառումն առաջին հերթին արդիական է այս ոլորտում։
Լրագրողների հետ զրույցում ՀՀ առողջապահության նախարարԱրմեն Մուրադյանը նշել է, որ առողջապահության տարեկան բյուջեի շուրջ 35-40 տոկոսն ուղղվում է մոր և մանկան ոլորտին: Նա ընդգծել է, որ ծախսարդյունավետության մասին խոսելիս առաջնահերթությունը տրվում է արդյունքներին: Նախարարը կարևորել է մանկական ծրագրերի հզորացումը, չափորոշիչների մշակումը, ինչպես նաև ֆինանսավորմանն ուղղված քայլերի անհրաժեշտությունը: