Սիրիահայերը ՀՀ արտգործնախարարի այցը Սիրիա «համայնքը սնուցող վիտամին» են համարել
2 րոպեի ընթերցում
![Սիրիահայերը ՀՀ արտգործնախարարի այցը Սիրիա «համայնքը սնուցող վիտամին» են համարել](http://armenpress.am/resized/480/static/news/b/2015/06/807731.jpg)
ԵՐԵՎԱՆ, 3 ՀՈՒՆԻՍԻ, ԱՐՄԵՆՊՐԵՍ: Հայաստանի կառավարությունն ուշադիր հետևում է Սիրիայում տիրող զարգացումներին և փորձում լուծումներ գտնել սիրիահայերի անվտանգության ապահովման համար:
«Արմենպրես»-ի փոխանցմամբˋ հունիսի 3-ին լրագրողների հետ հանդիպմանը նման դիրքորոշում հայտնեց ՀՀ արտաքին գործերի նախարար Էդվարդ Նալբանդյանըˋ անդրադառնալով Սիրիա կատարած այցելությանը, որի նպատակն էր ծանոթանալ Սիրիայում ընթացող զարգացումներին:
«Սիրիայում ճգնաժամի առաջին օրերից մեր ուշադրության կենտրոնում էր սիրիահայության անվտանգության ապահովման հարցը: Մենք կարծում ենք, որ ճգնաժամը հնարավոր կլինի լուծել ռազմական գործողությունների անհապաղ դադարեցման և Սիրիայի բոլոր քաղաքական ուժերի միջև երկխոսության հաստատման միջոցով»,- ընդգծեց նախարարը:
Այցի ընթացքում նախարարը հանդիպել է հայ համայնքի և հայկական կառույցների ղեկավարների հետ, որոնց ընթացքում կառույցներից մեկի ղեկավարն ասել է, թե հանդիպումն իրենց համար «վիտամին» է:
«Հայաստանում հազարավոր սիրիահայեր են գտնվում, և ՀՀ կառավարությունը արել և շարունակում է անել հնարավորը՝ աջակցելու մեր սիրիահայ եղբայրներին: Շատ կարևոր էր հանդիպել հայ համայնքի և կառույցների ղեկավարների հետ, մեր համերաշխությունն ու աջակցությունը հայտնել նրանցˋ նշելով, որ Հայաստանն իրենց թիկունքում է կանգնած»,- ասաց Նալբանդյանը: