Սերժ Սարգսյանը կարևորել է Չեխիայի փորձը ՀՀ սահմանադրական բարեփոխումների տեսանկյունից
3 րոպեի ընթերցում
![Սերժ Սարգսյանը կարևորել է Չեխիայի փորձը ՀՀ սահմանադրական բարեփոխումների տեսանկյունից](http://armenpress.am/resized/480/static/news/b/2015/06/807660.jpg)
ԵՐԵՎԱՆ, 2 ՀՈՒՆԻՍԻ, ԱՐՄԵՆՊՐԵՍ: ՀՀՆախագահ Սերժ Սարգսյանն հունիսի 2-ին ընդունել է ՀՀ ՍԴ նախագահի հրավերով Հայաստան ժամանած Չեխիայի Հանրապետության Սահմանադրական դատարանի նախագահ Պավել Ռիխետսկիին:
Ինչպես «Արմենպրես»-ին տեղեկացրին ՀՀ Նախագահի աշխատակազմի հասարակայնության և տեղեկատվության միջոցների հետ կապերի վարչությունից,Սերժ Սարգսյանը ողջունել է բարձրաստիճան հյուրին մեր երկրում և համագործակցության ամրապնդման ու փորձի փոխանակման տեսանկյունից կարևորել հաճախակի փոխայցելությունները, որոնք, Հանրապետության նախագահի խոսքով, հնարավորություն են ընձեռում անկաշկանդ մթնոլորտում համակողմանի քննարկել մասնագիտական հարցեր, կարծիքներ փոխանակել Սահմանադրության ոլորտին առնչվող հիմնախնդիրների շուրջ: Սերժ Սարգսյանը Չեխիայի ՍԴ նախագահի այցը նաև օգտակար է համարել Հայաստանում մեկնարկած սահմանադրական բարեփոխումների գործընթացի ներկայիս փուլում, ընդգծելով, որ յուրաքանչյուր երկրի փորձ և հատկապես եվրոպական երկրի՝ Հայաստանի համար կարևոր է:
Նախագահը գոհունակությամբ է խոսել հայ-չեխական միջպետական հարաբերությունների և տարբեր ոլորտներում փոխգործակցության մասին, որոնք, նրա խոսքով, վերջին տարիներին բավականաչափ ակտիվացել են: Ըստ Նախագահի, իրավական ոլորտում ևս հարաբերությունների զարգացմամբ երկու բարեկամ երկրների միջև համագործակցությունն ավելի ամբողջական կդառնա:
Չեխիայի ՍԴ նախագահը բարձր է գնահատել Հայաստանի ՍԴ-ի հետ ձևավորված համագործակցությունը և ընդգծել, որ Հայաստանը՝ որպես եվրոպական քաղաքակրթության օրրան, միայն հարգանք է առաջացնում, և Չեխիայում պատրաստակամ են հայ գործընկերների հետ խորացնել առկա փոխգործակցությունը:
Պավել Ռիխետսկին ՀՀ Նախագահին ներկայացրել է դեռևս 1920 թվականին հիմնված Չեխիայի ՍԴ-ի անցած ճանապարհը, ձեռքբերումները, երկրի սահմանադրական արդարադատության ներկայիս համակարգը և այն կատարելագործելու համար դեռևս առկա խնդիրները:
Հանրապետության Նախագահը փոխադարձաբար հյուրին ներկայացրել է ՀՀ սահմանադրական բարեփոխումների գործընթացը, այդ ճանապարհին եվրոպական կառույցների հետ սերտ համագործակցությունը, ինչպես նաև մեր երկրի համար հիշյալ բարեփոխումների կարևորությունն ու նպատակը: