ՀՀ ազգային փոքրամասնությունները ՄԱԿ-ի անդամ պետություններին կոչ արեցին ճանաչել Հայոց ցեղասպանությունը

ԵՐԵՎԱՆ, 21 ՄԱՅԻՍԻ, ԱՐՄԵՆՊՐԵՍ: Հայաստանի 11 ազգային փոքրամասնությունների ներկայացուցիչները համերգով իրենց վերաբերմունքն արտահայտեցին Հայոց ցեղասպանության հանդեպ և պատմական զուգահեռներ անցկացրեցին դրան հաջորդող ցեղասպանությունների, ներառյալ՝ ներկա պահին եզդի ժողովրդի նկատմամբ իրականացվող ցեղասպանության միջև: Այս մասին մայիսի 21-ին լրագրողներին տեղեկացրեց ՀՀ Նախագահի աշխատակազմի ազգային փոքրամասնությունների հարցերով մասնագետ Նարինե Գուլյանը:«Երեկոյի գաղափարը ուղերձն է ՄԱԿ անդամ պետություններին՝ ճանաչելու և դատապարտելու Հայոց ցեղասպանությունը, որպեսզի այլևս աշխարհում չկրկնվեն նման ցեղասպան ոճրագործություններ», - ասաց Նարինե Գուլյանը:

Համերգը բացվեց Վիլի Վայների երաժշտության ներքո և Հայոց ցեղասպանության վերաբերյալ էկրանին ցուցադրվողվավերագրական կադրերով:

«Հայաստանում բնակվող ազգային փոքրամասնությունները չէին կարող անմասն մնալ Հայոց ցեղասպանության 100-րդ տարելիցի շրջանակներում տեղի ունեցող միջոցառումներից: Այս առիթով ազգային փոքրամասնությունները, որոնց մի մասը Հայաստանում է հայտնվել ցեղասպանության հետևանքով, նկատի ունեմ ասորիներին, եզդիներին, քրդերին, հույներին, որոշեցին միջոցառում կազմակերպել, որի գերնպատակը կառուցված է մեկ գաղափարի վրա՝ կանխել պատերազմները», - ընդգծեց երեկոյի պատասխանատու, Հայաստանում ասորական համայնքի ներկայացուցիչ Ռազմիկ Խոսրոևը:

Համերգին ընթացքում իրենց ազգային երգն ու պարը ներկայացրեցին ուկրաինական, բելառուս, ասորի, եզդի, քուրդ, վրացի, հույն, հրեա և ռուս երիտասարդները:

«Սեփական փորձից կարող եմ ձեզ ասել, որ այն մարդկանց մեջ, ովքեր գալիս են Հայաստան, այցելում են Ծիծեռնակաբերդ և Հայոց ցեղասպանության թանգարան-ինստիտուտ, չկա մեկը, ով կժխտի Հայոց ցեղասպանության եղելությունը և այնուհետ չհանդիսանա ձայնափող, որը կոչ է անում մարդկանց ճանաչել Հայոց ցեղասպանությունը»,- նշեց Հայաստանի հրեական համայնքի նախագահՌիմա Վարժապետյան-Ֆելլերը: Նա օրինակ բերեց Իսրայելի Կնեսետի (Ազգային ժողով) խոսնակին, ով երկու տարի Հայաստան այցելությունից հետո տոգորվել էր Հայոց ցեղասպանության ճանաչման գաղափարով և կոչ էր արել Իսրայելի ժողովրդին և կառավարությանը ճանաչել Հայոց ցեղասպանությունը:

Համերգի ավարտին մասնակիցները, համախմբվելով «Առնո Բաբաջանյան» համերգասրահի բեմում, ընթերցեցին Հայաստանի ազգային փոքրամասնությունների ուղերձը ՄԱԿ-ի պետություններին՝ Հայոց ցեղապանության ճանաչման կոչով:

Միջոցառման նախաձեռնության առաջարկը հնչել է ՀՀ ազգային փոքրամասնությունների մշակութային կազմակերպությունների համակարգող խորհրդում, որտեղ ներգրավված են տասնմեկ ազգությունների ներկայացուցիչներ: Միջոցառման ֆինանսավորողը ՀՀ կառավարությունն է, որը տարեկան ազգային փոքրամասնությունների ներկայացրած ծրագրերի համար լրացուցիչ գումար է հատկացնում: