Ջակոմետիի «Մատնացույց անող մարդը» դարձել է աշխարհի ամենաթանկ քանդակը

ԵՐԵՎԱՆ, 12 ՄԱՅԻՍԻ, ԱՐՄԵՆՊՐԵՍ: Ալբերտո Ջակոմետիի «Մատնացույց անող մարդը» քանդակը Christie's-ի Նյու Յորքի աճուրդում վաճառվել է 141,285 մլն դոլարով՝ դառնալով աճուրդում երբեւիցե վաճառված ամենաթանկ քանդակը, տեղեկացնում է «Արմենպրես»-ը:

180-սանտիմետրանոց բրոնզե քանդակը շվեյցարացի վարպետի կողմից ստեղծվել է 1947 թվականին: Այն համարվում էր Christie's-ի «Հառաջ դեպի անցյալ» աճուրդի ամենաթանկ լոտերից մեկը:

Քանդակը եզակի է նաեւ այն առումով, որ վարպետն ինքն է իր ձեռքով այն ներկել: Մինչ այժմ ամենաթանկ քանդակը Ջակոմետիի «Քայլող մարդն» էր: 2010 թվականին այդ կոմպոզիցիան Christie's-ի աճուրդում վաճառվել էր 104 մլն դոլարով, հաղորդել է ՌԻԱ Նովոստին: