Վիկտոր Կրիվոպուսկովը Ցեղասպանության ժխտման մեջ անցանկալի իրավիճակների վտանգ է տեսնում

ԵՐԵՎԱՆ, 23 ԱՊՐԻԼԻ, ԱՐՄԵՆՊՐԵՍ: Միջազգային հանրության կողմից Օսմանյան կայսրությունում Հայոց ցեղասպանության դատապարտման մասին միասնական որոշման բացակայությունը կարող է հանգեցնել անցանկալի իրավիճակների աշխարհի որոշ խնդրահարույց գոտիներում: «Արմենպրես»-ի հետ զրույցում նման կարծիք հայտնեց Հայաստանի հետ համագործակցության և բարեկամության հարցերով ռուսական համայնքի նախագահ, Հայաստանի գրողների միության պատվավոր անդամ Վիկտոր Կրիվոպուսկովը: «Մենք ականատես ենք եղել ոչ միայն գլոբալ ցեղասպանությունների, որոնք իրականացվել են 20-րդ դարում, այլ նաև ականատես ենք լինում ցեղասպանությունների 21-րդ դարում: Ես նկատի ունեմ Մերձավոր Արևելքում ստեղծված իրավիճակը»,- ընդգծեց նա:

Նրա խոսքով՝ եթե դեռ 19-րդ դարի 70-ական թվականներին եվրոպական դատարանների կողմից Օսմանյան կայսրության գործողություններին տրվեր համապարփակ գնահատական և կայացվեր համապատասխան վճիռ, ապա չէր լինի շուրջ 2 միլիոն հայերի սպանությունը: «Եվ խոսքը միայն 1.5 միլիոն հայերի մասին չէ, ովքեր սպանվել են Հայոց ցեղասպանության ընթացքում: Խոսքը նաև Շուշիում 32 հազար հայերի սպանությունների մասին է, որոնք տեղի են ունեցել 1921թ.-ին»,- ասաց Կրիվոպուսկովը՝ ընդգծելով, որ այս ամենին համապատասխան գնահատական չտալը հանգեցրեց Հոլոքոստին, Ռուանդայի և Կամբոջայի ցեղասպանություններին»,- նշեց Կրիվոպուսկովը:

Նրա գնահատմամբ՝ ցեղասպանություն է, երբ խախտվում է առաջին հերթին յուրաքանչյուր մարդու ապրելու իրավունքը, հատկապես, եթե դա տեղի է ունենում ազգայնական հողի վրա: «Ուստի, ես մեծապես կարևորում եմ Հայաստանում «Ընդդեմ ցեղասպանության հանցագործության» խորագրով գլոբալ ֆորումի անցկացումը, ինչը շատ կարևոր նշանակություն ունի: Քանի դեռ չկա Հայոց ցեղասպանության համաշխարհային ճանաչում, ես նման ֆորումներ կանցկացնեի պարբերաբար: Եվ դրանք պետք է անցկացվեն Հայաստանում, դրանք պետք է աշխարհի բոլոր խորհրդարանների առջև բարձրացնեն Հայոց ցեղասպանության միջազգային ամբողջական ճանաչման անհրաժեշտության հարցը, պետք է շոշափեն և բոլորի համար ընկալելի դարձնեն այն հարցը, որ մարդկության դեմ հանցագործությունները վաղեմության ժամկետ չունեն»,- հավելեց Կրիվոպուսկովը:

Նրա խոսքով՝ տարբեր երկրների ժողովուրդները միջանձնային մակարդակում միյանց վստահում են: «Սակայն ինչո՞ւ ենք մենք ընտրում երկրի ղեկավարների, ովքեր խախտում են սահմանադրական վստահությունը և այդ համապատկերում ասպարեզ են բերում նացիզմի, ֆաշիզմի, ցեղասպանությունների, մարդկության դեմ հանցագործությունների դրսևորումներ: Սա նշանակում է, որ մենք այդքան էլ միասնական չենք: Ուստի, հարկավոր է, որպեսզի աշխարհը միասնական լինի, և նախևառաջ սկսել այնպիսի գլոբալ ֆորումից, ինչպիսին այսօր անցկացվում է Երևանում»,- եզրափակեց Հայաստանի հետ համագործակցության և բարեկամության հարցերով ռուսական համայնքի նախագահԿրիվոպուսկովը: