Հայոց ցեղասպանության ժխտումը պետք է համաշխարհային մակարդակով քրեականացվի. Ֆրանսուա Ռոշբլուան
2 րոպեի ընթերցում
ԵՐԵՎԱՆ, 23 ԱՊՐԻԼԻ, ԱՐՄԵՊՐԵՍ: Ֆրանսիայի Ազգային ժողովի պատգամավոր Ֆրանսուա Ռոշբուլան վստահ է, որ ցեղասպանությունների կանխարգելման լավագույն ուղին ոչ միայն դրանց դատապարտումն է, այլեւ ժխտողականությունը քրեական հանցանք սահմանելը: «Հայոց ցեղասպանության ժխտման մեջ տեսնում եմ զայրացուցիչ դրսեւորում, որը սպառնալիք է հանրային ազատությունների համար, քանի որ ոտնահարվում է արդարությունը եւ մարդկանց արժանապատվությունը: Անհրաժեշտ է քրեական պատիժ սահմանել նման գործելակերպի համար, որպեսզի հնարավոր չլինի նման ցեղասպանական գործողություններ կատարել: Ցեղասպանության ժխտումը պետք է քրեական պատիժ հռչակվի համաշխարհային մակարդակով: Ցավում եմ, որ ֆրանսիայում Սահմանադրական խորհուրդը խոչընդոտեց նման օրենքի ընդունումը: Մենք շարունակում ենք մեր աշխատանքները այդ խոչընդոտները վերացնելու համար»,- «Արմենպրես»-ի փոխանցմամբ «Ընդդեմ ցեղասպանության հանցագործության» միջազգային ֆորումի ժամանակ ասաց ֆրանսիայի պատգամավորը` շեշտելով, որ որպես խորհրդարանականներ իրենց վրա զգում են նաեւ թուրքական ճնշումները:
Անդրադառնալով ցեղասպանությունների խնդրին՝ նա շեշտեց, որ միջազգային հանրությունը պետք է լրջորեն մտածի կանխարգելման մասին: «20-րդ դարի վերջին Սումգայիթում կայացած ջարդերը փաստեցին, որ այն, ինչ տեղի է ունեցել դարասկզբին, կարող է վայրագ ձեւով կրկնվել նաեւ մեր օրերում: Այս առնչությամբ իմ համերաշխությունն եմ հայտնում Արցախի ժողովրդին, նրա ինքնորոշման իրավունքին»,- ասաց պատգամավորը` հավելելով, որ իր համերաշխությունն է հայտնում Հռոմի Ֆրանցիսկոս պապին եւ համամիտ է Վատիկանի սուրբ Պետրոսի տաճարում հնչեցրած նրա մտքերի հետ: