Վան Բայբուրթյանն արժանացել է Վրաստանի վաստակավոր ժուռնալիստի պատվավոր կոչման
2 րոպեի ընթերցում
![Վան Բայբուրթյանն արժանացել է Վրաստանի վաստակավոր ժուռնալիստի պատվավոր կոչման](http://armenpress.am/resized/480/static/news/b/2015/04/801909.jpg)
ԵՐԵՎԱՆ, 15 ԱՊՐԻԼԻ, ԱՐՄԵՆՊՐԵՍ: Թբիլիսիի «Վրաստան» թերթի գլխավոր խմբագիր և Վրաստանի խորհրդարանի նախկին պատգամավոր ՎանԲայբուրթյանին(Բայբուրդ) շնորհվել է Վրաստանի վաստակավոր ժուռնալիստի պատվավոր կոչում: «Արմենպրես»-ի հետ զրույցում Վան Բայբուրթյանը պատմեց, որ տասնյակ տարիներ Վրաստանում լրագրողական գործունեություն է իրականացրել` աշխատելով տարբեր խմբագրություններում:
«Թբիլիսիի հայկական դպրոցն ավարտելուց հետո ուսումս շարունակել եմ Թբիլիսիի համալսարանի ժուռնալիստիկայի ֆակուլտետում: Այդ ժամանակ էլ սկսվել է լրագրողական իմ աշխատանքը: Առաջին քայլերս արել եմ «Կոմսոմոլսկայա պրավդա» թերթում, որն էլ համարում եմ իմ մասնագիտական գլխավոր փորձառութունը»,- ասաց վաստակավոր ժուռնալիստը:
Վան Բայբուրթյանը լրագրողական աշխատանքի երկար տարիների վաստակ ունի, նա աշխատել է Հայաստանում «Սովետսկի սպորտ» և «Կոմսոմոլսկայա պրավդա» թերթերի սեփական թղթակից, Մոսկվայի Նորությունների գործակալության սեփական թղթակից և արհեստավարժ ժուռնալիստի կարգավիճակով ստանձնել «Վրաստան» թերթի խմբագրի պաշտոնը: Նա արդեն տասնյակ տարիներ մեծ սիրով նվիրվել է հայատառ պարբերականի ղեկավարի պաշտոնավարությանը:
Վան Բայբուրթյանը նաև հասարակական-քաղաքական ակտիվ գործիչ է: Եղել է Վրաստանի խորհրդարանի մի քանի գումարման պատգամավոր, Վրաստանի Նախագահի խորհրդական և Վրաստանում առաջին համայնքային կազմակերպության՝ Հայկական բարեգործական մշակութային ընկերության հիմնադիրներից մեկը: Վան Բայբուրթյանը մինչև օրս հանդիսանում է Վրաստանի հայերի միության փոխնախագահ: