Հայաստանն ակտիվ էներգետիկ քաղաքականություն վարելու հնարավորություն ունի. պատգամավոր

ԵՐԵՎԱՆ, 13 ԱՊՐԻԼԻ, ԱՐՄԵՆՊՐԵՍ: ՀՀ ԱԺ ԲՀԿ խմբակցության պատգամավոր Միքայել Մելքումյանը հնարավոր է համարում բնակչության համար գազի սակագնի 7-8 տոկոսի իջեցումը: Այս մասին լրագրողների հետ հանդիպման ժամանակ հայտնեց պատգամավորը: «Մենք պարտավոր ենք այնպես անել, որ գազի սակագինը պետական սահմանի վրա չբարձրացվի, պետությունը պետք է բանակցի այդ հարցով: 2003-2004 թթ. մենք սահմանի վրա 54 դոլարով էինք գնում գազը, որը մատակարարվում էր 94 դոլարով 1000 խորանարդ մետրի դիմաց: Եթե այն ժամանակ առքուվաճառքի գների տարբերությունը 40 դոլար էր, այսօր այն կազմում է 200 դոլար: Երբ դիտարկենք 10-12 տարվա ընթացքում գազամատակարարման ու գազասպառման ոլորտում լրացուցիչ բեռնվածության ավելացումը, կտեսնենք, որ այդքան շատ չէ: Մենք պետք է այլընտրանքային հավակնոտ ծրագրեր իրականացնենք: Հայաստանի արտադրանքի մրցունակությունը չենք կարող գցել` բարձրացնելով գազի ու էլեկտրաէներգիայի սակագինը»,- «Արմենպրես»-ի փոխանցմամբ` ասաց պատգավորը:

Միքայել Մելքումյանի դիտարկմամբ` պետք է մտածել խոշոր սպառողների շրջանում գազասպառման ծավալները մեծացնելու մասին:

«Սպառման ծավալները բնակչության հաշվին չէ, որ ապահովում ենք: 1.7 միլիարդ խորանարդ մետրի մեջ 554 միլիոն խորանարդ մետրն է, որ սպառում է բնակչությունը, այսինքն` մեկ երրորդը: Մնացածը բաժին է ընկնում արդյունաբերությանը: Որքան մենք ավելացնենք ոչ բնակչության կողմից սպառման ծավալները, մենք կարող ենք այդքան էֆեկտ ունենալ բնակչության սակագնի համար: Մենք պետք է գնանք էժան էներգետիկա արտադրելու ճանապարհով»,-ասաց Միքայել Մելքումյանը:

Անդրադառնալով Իրանից էժան գազ գնելու հարցին` պատգամավորը նշեց, որ կան որոշակի խոչընդոտներ, որոնք փորձ է արվում շտկել: «Իրանի գազը էժան է, քանի որ այն արդյունահանվում է նավթի արդյունահանման ժամանակ: Մյուս կողմից` 1-ը 3-ի սխեմայով, երբ Իրանը մեզ տալիս է մեկ խմ գազ, իսկ մենք նրան տալիս ենք 3 կիլովատ էլեկտրաէներգիա, արդյունքում 1.5 կիլովատ էլեկտրաէներգիան մեզ մնում է անվճար: Բայց մենք չենք կարողանում այս գործընթացն ավելի ընդլայնել, քանի որ մեր բարձր լարման Իրան-Հայաստան, Հայաստան-Վրաստան էլեկտրահաղորդման գծերը ցածր թողունակություն ունեն»,-ասաց պատգամավորը: Նրա խոսքով` լուրջ ջանքեր են գործադրվում բարձր լարման թողունակությունը մեծացնելու առումով: «Դա թույլ կտա շատ գազ ստանալ էլեկտրաէներգիայի տեսքով հետ տալու փոխարեն, որ կարողանանք սակագները պահպանել»,-նշեց Միքայել Մելքումյանը` հավելելով, որ գազատուրբինային էներգիայի արտադրության գրավիչ պայմանների պարագայում հնարավոր կլինի նոր ներդրումներ ներգրավել: