Ռիո Կալեգոս քաղաքի կենտրոնական հրապարակը կկրի «Ի հիշատակ Հայոց ցեղասպանության զոհերի» անվանումը
1 րոպեի ընթերցում
![Ռիո Կալեգոս քաղաքի կենտրոնական հրապարակը կկրի «Ի հիշատակ Հայոց ցեղասպանության զոհերի» անվանումը](http://armenpress.am/resized/480/static/news/b/2015/04/801333.jpg)
ՌԻՈ ԿԱԼԵԳՈՍ, 11 ԱՊՐԻԼԻ, ԱՐՄԵՆՊՐԵՍ: Արգենտինայի Սանտա Կրուզ նահանգի Ռիո Կալեգոս քաղաքի կենտրոնական հրապարակն այսուհետև կկոչվի «Ի հիշատակ Հայոց ցեղասպանության զոհերի»:
Ինչպես հաղորդում է «Արմենպրես»-ը՝ վկայակոչելով PrensaArmenia.com.ar-ը, որոշումը կայացրել է Ռիո Կալեգոսի քաղաքային խորհուրդը: Սանտա Կրուզի ներկայացուցիչների պալատը միաձայն ընդունել է նաեւ Հայոց ցեղասպանության ճանաչման եւ 100-րդ տարելիցի միջոցառումների անցկացման մասին հայտարարություն` միաժամանակ շեշտելով, որ տարելիցին նվիրված լուսանկարչական ցուցահանդեսի անցկացումը բխում է նահանգի շահերից:
Սանտա Կրուզում ՀՅԴ Հայ դատի հանձնախմբի ներկայացուցիչ Ալեխանդրո Ավագյանը բարձր է գնահատել ջանքերը, որոնք պետք է Թուրքիային ստիպեն առերեսվելու իր պատմությանը:
Արգենտինայի ներկայացուցիչների պալատն այս շաբաթ նաեւ հայտարարություն է տարածել, որով իր համերաշխությունն է հայտնում Արգենտինայի հայ համայնքին՝ ապրիլի 24-ին Հայոց ցեղասպանության 100-րդ տարելիցի միջոցառումների կազմակերպման առիթով: