1 րոպեի ընթերցում
ԵՐԵՎԱՆ, 10 ՄԱՐՏԻ, ԱՐՄԵՆՊՐԵՍ: Թեհրանի հայոց թեմի 100-ամյակի հանձնախմբի կողմից Հայոց ցեղասպանության 100-ամյակի տարելիցի առիթով հայտարարվել է համահամայնքային ծառատունկ:
Այս մասին «Արմենպրես»-ը տեղեկացավ «Ալիք» օրաթերթից: «Սոհանաք» այգու գողտրիկ անկյունում իր ուրույն տեղը կունենա բյուրավոր նահատակների հիշատակը հավերժացնող ծառուղին:
Ծառատունկի ժամանակ տնկվել են ցեղասպանության 100 տարին խորհրդանշող 100 ծառ: Միջոցառմանը ներկա է գտնվել Թեհրանի նահանգի Բնական պաշարների վարչության գծով փոխտնօրեն Հաղղանին, ով բարձր է գնահատել միջոցառման գաղափարը՝ ավելացնելով, որ ծառուղիում կարող է փակցվել հուշատախտակ, որը կհիշեցնի` պուրակը նվիրված է հայ նահատակների հիշատակին:
Թեհրանի անտառների և արոտավայրերի պահպանման վարչության ներկայացուցիչ Մոհաբաթ Սալարին խոստացել է, որ պուրակը հատուկ ուշադրության և խնամքի կարժանանա:
Թ.Հ.Թ. 100-ամյակի հանձնախմբի անդամ Վահիկ Աղաքյանը շնորհակալություն է հայտնել պատկան մարմիններին, որ առիթ են ընծայել 100-րդ տարելիցի առիթով ծառատունկ իրականացնելուն: