1 րոպեի ընթերցում
ԳՅՈՒՄՐԻ, 16 ՀՈՒՆՎԱՐԻ, ԱՐՄԵՆՊՐԵՍ: Շիրակի մարզպետը կոչ է անում դատել սառն ու հանդուրժողական լինել: Ֆելիքս Ցոլակյանը հունվարի 16-ին գյումրեցիներին զգոնության կոչով է դիմել:
«2015 թվականի առաջին աշխատանքային օրը մեզ համար սկսվեց մի անսպասելի, անակնկալ, իր որակի մեջ շատ դաժան ոճրագործությամբ՝ մի ամբողջ գյումրեցի ընտանիք սպանվեց մարդկային կերպարը կորցրած ոճրագործի կողմից: Առաջացան բնական հարցեր՝ ինչո՞ւ, ինչպե՞ս ու որտե՞ղ: Ու դրանից հետո գյումրեցիները կազմակերպեցին խաղաղ ցույցեր: Այո՛, մենք համակարծիք ենք, որ հանցագործը պետք է պատժվի, ամենախիստ պատիժը պետք է ստանա, ու այդ ցույցերի պահանջն էլ դա էր: Եկավ մի պահ, երբ գյումրեցիների այս պահանջը վերածվեց մեկ այլ երեւույթի՝ ցուցարարների ու ոստիկանների միջեւ բախումների: Ցավոք սրտի, եղան նաեւ տուժածներ՝ 28 վիրավոր: Սա արդեն հասարակական կարգի խախտում է: Ես հասկանում եմ զգացմունքերը, բայց միայն զգացմունքերին տրվել՝ սխալ եմ համարում: Բոլոր հարցերը հնարավոր է լուծել, հնարավոր է լուծել սառը դատողությամբ, հանգիստ պայմաններում: Բոլորիս կոչ եմ անում՝ լինել հանդուրժողական, համբերատար, միահամուռ ու համերաշխ»,- «Արմենպրես»-ի հաղորդմամբ` նշեց մարզպետը:
Արմենուհի Մխոյան