2 րոպեի ընթերցում
ԵՐԵՎԱՆ, 28 ՀՈԿՏԵՄԲԵՐԻ, ԱՐՄԵՆՊՐԵՍ: Դուբայում կկառուցվեն աշխարհում ամենաբարձր երկվորյակ-աշտարակները: Այդ մասին, ինչպես տեղեկացնում Է «Արմենպրես»-ը, հոկտեմբերի 28-ին հաղորդել Է Էմիրությունների Arabian Business գործարար հրատարակությունը:
Dubai Twin Towers անվանմամբ երկնաքերը կդառնա անշարժ գույքի բնագավառի նոր մեգանախագծի բաղկացուցիչ մասը, որի մասին նոյեմբերի 1-ին կհայտարարեն Դուբայի Emaar Properties կառուցող ընկերությունը եւ Dubai Holding ներդրումային ընկերությունը:
Երկնաքերի ճշգրիտ բարձրության մասին առայժմ չի նշվում: Ներկայում ամենաբարձր երկվորյակ-աշտարակներն են համարվում 452 մետր բարձրությամբ Petronas Twin Towers-ը, որոնք գտնվում են Մալայզիայի մայրաքաղաք Քուալա Լումպուրում:
Երկվորյակ-աշտարակները կդառնան բնակելի եւ առեւտրային անշարժ գույքի ընդգրկուն համալիրի բաղկացուցիչ մասը, որը կտեղավորվի Դուբայի ծովախորշի ափին: Այս նոր շրջանը, որին ստեղծողները «ապագայի քաղաք» անվանումն են տվել, Դուբայի հետ, բացի ավտոմայրուղիներից, կկապեն տրանսպորտի Էկոլոգիապես մաքուր տեսակները՝ թեթեւ մետրոն, արագընթաց տրամվայը եւ ջրային տաքսին: Նախագծի ընդհանուր մակերեսը կազմում Է 600 հեկտար:
Ներկայում աշխարհի ամենաբարձր շենքը՝ 828 մետր բարձրությամբ Burj Khalifa երկնաքերը, նույնպես գտնվում Է Դուբայում: Դրա շինարարությունն ավարտվել Է 2010 թվականին, հաղորդել Է ՌԻԱ Նովոստին: