2 րոպեի ընթերցում
ԵՐԵՎԱՆ, 8 ՍԵՊՏԵՄԲԵՐԻ, ԱՐՄԵՆՊԵՍ: Եվրոպայի խորհրդում նախագահությունն ընտրվում է երկրների այբբենական հերթականությամբ եւ հենց այդ պատճառով է Ադրբեջանը ստանձնել Եվրոպայի խորհրդի նախագահությունը: «Ցանկանում եմ շեշտել, որ Ադրբեջանը չի ընտրվել, զուտ այբբենական հերթականության պատճառով է դարձել ԵԽ-ն նախագահող երկիր: Սա կարեւոր փաստ է: Ինչ վերաբերում է մարդու իրավունքներին եւ խոսքի ազատության սահմանափակումներին, անշուշտ մենք մտահոգված ենք այն վիճակով, որ առկա է Ադրբեջանում: Ավստրիան ԵՄ անդամ պետություն է եւ շատ է կարեւորում մարդու իրավունքներ»,- «Արմենպրես»-ի հարցին ի պատասխան սեպտեմբերի 8-ին ՀՀ արտաքին գործերի նախարարությունում կայացած ասուլիսի ժամանակ ասաց Ավստրիայի Հանրապետության Եվրոպայի, ինտեգրացիայի և արտաքին գործերի նախարար Սեբաստիան Կուրցը:
Ավստրիացի դիվանագետն ասաց, որ մի քանի օրից այցելելու է Ադրբեջան եւ տեղում քննարկելու մարդու իրավունքների վիճակը: «Մեզ հատկապես անհանգստացնում է Բաքվում քաղաքական բանտարկյալների իրավիճակը եւ մենք կօգտագործենք մեր հնարավորությունները արտահայտելու քննադատական դիրքորոշում այդ իրավիճակի վերաբերյալ»,- ասաց Կուրցը:
ԱԳ նախարար Էդվարդ Նալբանդյանի հրավերով սեպտեմբերի 8-9-ը պաշտոնական այցով Հայաստանում է Ավստրիայի Հանրապետության Եվրոպայի, ինտեգրացիայի և արտաքին գործերի նախարար Սեբաստիան Կուրցը:
Այսօր Ավստրիայի Հանրապետության արտգործնախարարն այցելել է Ծիծեռնակաբերդ եւ հարգանքի տուրք մատուցել Հայոց ցեղասպանության զոհերի հիշատակին: Այցի շրջանակներում Ավստրիայի արտգործնախարարը ներկա կգտնվի նաեւ Հայաստանում Ավստրիական զարգացման գործակալության գրասենյակի բացման արարողությանը: