3 րոպեի ընթերցում
ԵՐԵՎԱՆ, 7 ՕԳՈՍՏՈՍԻ, ԱՐՄԵՆՊՐԵՍ: Աշխարհի ամենաերկար հետադարձելի ճոպանուղին`«ՏաԹևերը» փոխադրել է իր հոբելյանական ուղևորին: 250-հազարերորդ ուղևորն է դարձել Մերի Հովհաննիսյանը Եղեգնաձորից, որը Տաթև էր եկել Սանկտ Պետերբուրգից ժամանած եղբոր՝ Արթուր Բայաթյանի հետ: Ճոպանուղու անձնակազմը անակնկալ էր պատրաստել հոբելյանական հաճախորդի համար՝ նվիրելով մեկ տարվա ընթացքում «ՏաԹեւեր» ճոպանուղուց անվճար օգտվելու հնարավորություն, ինչպես նաեւ տարբեր հուշանվերներ։ «Շնորհավորում ենք Մերիին և Արթուրին` շնորհակալություն հայտնելով նրանց, ինչպես նաեւ «ՏաԹևեր» ճոպանուղու մյուս բոլոր ուղևորներին: Գործունեության 4 տարվա ընթացքում ճոպանուղին տեղափոխել է 250 հազար զբոսաշրջիկի, և սա դեռ մեր մեծ ծրագրերի սկիզբն է։ Առաջիկայում «Տաթևի վերածնունդ» ծրագրի շրջանակում կստեղծվեն նոր զբոսաշրջային ենթակառուցվածքներ` նպաստելով առավել մեծ քանակի զբոսաշրջիկների հոսքին դեպի Տաթեւ եւ «ՏաԹևեր» ճոպանուղի»,-«Արմենպրես»-ի հաղորդմամբ, ասել է «Տաթևի վերածնունդ» ծրագրի տնօրեն Արեն Ափիկյանը։
Նա հիշեցրել է, որ ճոպանուղուց ստացվող եկամուտն ուղղվում է Տաթևի վանական համալիրի վերականգման եւ համայնքային զարգացման ծրագրերին:
«Հայաստանի զարգացման նախաձեռնություններ» (IDeA) հիմնադրամի տնօրեն Արտակ Մելքոնյանը տեղեկացրել է, որ հիմնադրամը շարունակելու է անակնկալներ մատուցել «ՏաԹևեր» ճոպանուղու հաճախորդներին, ինչպես նաև ակտիվացնելու է համայնքային զարգացման ծրագրերը։ «Կազմակերպվում են մի շարք միջոցառումներ և փառատոններ՝ աջակցելու տեղական արհեստագործական և գյուղատնտեսական արտադրանքի սպառմանը։ Շուտով կսկսվեն Տաթևի վանական համալիրի վերանորոգման աշխատանքները։ Իրականացվող ծրագրերը խթանում են զբոսաշրջային հոսքերի կայուն աճը, որի արդյունքում հույս ունենք այս տարի արդեն սպասարկել ճոպանուղու 300-հազարերորդ հաճախորդին»,- ասել է նա:
Աշխարհում ամենաերկար հետադարձելի «ՏաԹևեր» ճոպանուղին տեղակայված է Հայաստանի հարավում` Սյունիքի մարզում, Երեւանից 250 կմ հեռավորությամբ: «ՏաԹևեր» երկնային անցուղին, որը կապում է Որոտանի կիրճի երկու կողմերը, հանդիսավոր արարողությամբ պաշտոնապես գործարկվել է 2010թ. հոկտեմբերի 16-ին: 2010թ. հոկտեմբերի 23-ին «Գինեսի համաշխարհային ռեկորդներ» ընկերության տեսուչներն արձանագրել են Ճոպանուղու ռեկորդային երկարությունը՝ 5752 մ: