1 րոպեի ընթերցում
ԵՐԵՎԱՆ, 20 ՀՈՒՆԻՍԻ, ԱՐՄԵՆՊՐԵՍ: Apple ընկերության՝ այսպես կոչված «խելացի ժամացույցի» զանգվածային արտադրությունը կսկսվի արդեն հուլիսին Տայվանի ձեռնարկությունում: Այդ մասին, ինչպես տեղեկացնում է «Արմենպրես»-ը, հաղորդել է Reuters գործակալությունը՝ վկայակոչելով ծրագրին մոտ կանգնած մի աղբյուր:
Apple-ի կողմից համակարգչի գործառույթներով օժտված եւ ժամացույց ձեւ ունեցող սարքի թողարկման վերաբերյալ լուրերը շուկայում տարածվել են անցյալ տարվանից: Սարքի անվանումն առայժմ պաշտոնապես չի հայտարարվել, բայց «խնձորային արտադրանքի» երկրպագուներն արդեն այն կոչել են iWatch` ընկերության մյուս գաջեթների՝ iPad-ի եւ iPhone-ի համանմանությամբ:
Գործակալության զրուցակիցները հայտնել են, որ նորույթի ուղղանկյուն Էկրանի անկյունագծի չափը կկազմի 2,5 դյույմ: «Խելացի ժամացույցի» թվատախտակը փոքր-ինչ դուրս ցցված կլինի ապարանջանից՝ կազմելով կամարի ձեւ: Ժամացույցի համար նախատեսված է սենսորային ինտերֆեյս եւ սարքի անհաղորդալար լրալիցքավորման հնարավորություն:
Արտադրության արդեն աաջին տարում Apple-ը մտադիր Է շուկային մատակարարել 50 միլիոն սարք, հաղորդել Է ՌԻԱ Նովոստին: