3 րոպեի ընթերցում
ԵՐԵՎԱՆ, 6 ՀՈՒՆԻՍԻ, ԱՐՄԵՆՊՐԵՍ:Բոլոր ժամանակների մեծագույն կոմպոզիտորներից մեկը, դիրիժոր, լեգենդ…Հունիսի 6-ն Արամ Խաչատրյանի ծննդյան օրն է: Երաժշտարվեստի մեծագույն անուններից մեկն անգնահատելի հետք է թողել մշակույթի պատմության մեջ: «Նա մեր փոքրության առասպելի մեծ հերքումը եղավ, մեծերի հետ չափվելու խորհուրդը եղավ փոքրաթիվ մեր ժողովրդի... Դարձավ քաղաքակրթության մեր վկայականը...»,- անվանի կոմպոզիտորի մասին ասել է Համո Սահյանը:
«Արմենպրես»-ի փոխանցմամբ, նախորդ տարի Հայաստանում և ամբողջ աշխարհում բազմաթիվ տոնական միջոցառումներով նշվեց անվանի կոմպոզիտորի 110-րդ հոբելյանը: Տոնական միջոցառումները շարունակվեցին նաև այս տարի: Խաչատրյանի գործերը հնչեցին աշխարհի տարբեր ծայրերում:
2013-ի վերջին հանրության դատին ներկայացվեց նաև Արամ Խաչատրյանի բազմաժանր ստեղծագործական ժառանգությունն ամփոփող ձայնադարանը: Այն թողարկվել էր Արամ Խաչատրյանի 110-ամյա հոբելյանին նվիրված տոնակատարությունների և միջոցառումների շրջանակում` ՀՀ մշակույթի նախարարության նախաձեռնությամբ:
Խաչատրյանական ոգին թևածեց ամբողջ տարի` բոլորին պարգևելով անմոռաց ակնթարթներ:
Արամ Խաչատրյանը ծնվել է 1903 թվականին Կոջորում: 1913 թ. ընդունվել է Թիֆլիսի Կոմերցիայի դպրոց, սակայն նախընտրել է երաժշտությունը։ Որոշ ժամանակ փողային գործիքներ ինքնուրույն նվագել սովորելով` ընդունվել է փողային նվագախումբ։ 1921թ. ընդունվել է ՄոսկվայիԳնեսինների երաժշտական քոլեջ, այնուհետև Մոսկվայի կոնսերվատորիա, որտեղ ուսանել է հայտնի ռուս կոմպոզիտոր և ուսուցիչ Ն. Յա.Մյասկովսկու մոտ։ Առաջին խոշոր աշխատանքը եղել է «Առաջին սիմֆոնիան»։ 1939թ. գրել է առաջին բալետը, որն ի սկզբանե կոչվել է «Ուրախություն», հետագայում վերանայվել և վերանվանվել է «Գայանե»։ 1956թ. դեկտեմբերի 27-ին կոմպոզիտորի «Սպարտակ» բալետը բեմադրվել է Կիրովի բեմում։ 1954 թ. կոմպոզիտորն արժանացել է ԽՍՀՄ, 1955 թ.` ՀԽՍՀ ժողովրդական արտիստի կոչման, որից հետո` բազմաթիվ պետական պարգևների, մրցանակների: Մահացել է Մոսկվայում, թաղված է Երևանի Կոմիտասիանվան զբոսայգու պանթեոնում: Երևանում գործում է նրա տուն- թանգարանը: Նրա անունով են կոչվել Երևանի ֆիլհարմոնիկ մեծ դահլիճը, փողոցներ Երևանում և այլ քաղաքներում: