Գագիկ Հարությունյանն օբյեկտիվ իրականության հրամայականն է համարում սահմանադրական բարեփոխումները

ԵՐԵՎԱՆ, 20 ՄԱՅԻՍԻ, ԱՐՄԵՆՊՐԵՍ: Սահմանադրական բարեփոխումները հետաձգելն ավելի բարդ խնդիրների կհանգեցնի: Նման համոզմունք հայտնեց ՀՀ Սահմանադրական դատարանի նախագահ Գագիկ Հարությունյանը«Հայաստանում սահմանադրական բարեփոխումների նախնական հայեցակարգի» թեմայով հանրային քննարկման ժամանակ: «Սահմանադրականության ապահովման, անձի սոցիալական վարքագիծը, իշխանության, քաղաքական իստիտուտների քաղաքական վարքագիծը կանոնակարգելու համար ես ձեռնամուխ եղա այս գործին: Մենք ոչ միայն կատարում ենք հարցադրումներ, այլ ստեղծում ենք մի համակարգ, որտեղ այդ բոլոր խնդիրներն ունեն լուծումներ»,-ասաց Գագիկ Հարությունյանը:

Ուսումնասիրելով նախաքրիստոնեական շրջանից մինչև այսօր հայ հասարակության սահմանադրականության պատմությունը կոնկրետ դրսևորումների մեջ` Գագիկ Հարությունյանը եկել է այն եզրահանգման, որ հինգերորդ դարում ու դրանից հետո հայ ժողովուրդն ունեցել է սահմանադրական մշակույթի ավելի բարձր մակարդակ, քան այսօր: «Այսօր մենք ունենք ժողովուրդ, չունենք քաղաքացի: Մենք ունենք իրավիճակներ, որոնք հիվանդագին կարելի է համարել: Բուժման հիմնական մոտեցումը այն է, որ Սահմանդրությունը չպետք է հնարավորություն տա նման վիճակների առաջացմանը: Սահմանադրական բարեփոխումներին գնալու հիմնական խնդիրն այն է, որ մենք օբյեկտիվորեն ելնում ենք այսօրվա իրականությունից և գտնում ենք, որ սահմանադրական լուծումները պետք է Սահմանադրության անվտանգությունը երաշխավորեն, ներքին հակասությունները հաղթահարեն, ապահովվի համակարգային ամբողջականությունը, որ կարողանանք հաջորդ քայլին անցնենք»,-նշեց ՍԴ նախագահը:

Գագիկ Հարությունյանի խոսքով` սահմանադրական փոփոխությունների վերաբերյալ այսօր առկա է կամ մերժողականություն, կամ հայեցողականություն, որը պետք է տանել ավելի լուրջ հարթություն: «Բարեփոխումների գործընթացը պետք է հիմա իրականացնենք, ու ես անձամբ համոզված եմ, որ այս փոփոխություններով պետք է ոչ թե զուտ տեսական դատողություններ շարադրենք, այլ կիրառական դրույթներ»,-ասաց ՍԴ նախագահը:

Սահմանադրական բարեփոխումների նախնական հայեցակարգի շուրջ մայիսի 20-ից մեկնարկել է հանրային քննարկումների շարքը: Քննարկման թեման է՝ «Իրավունքի գերակայության սկզբունքի երաշխավորումը, ապահովումն ու իրացումը սահմանադրական լուծումներում, մարդու և քաղաքացու հիմնական իրավունքներին ու ազատություններին առնչվող սահմանադրական լուծումները»:

Քննարկումը կազմակերպվել է ՀՀ նախագահին առընթեր սահմանադրական բարեփոխումների մասնագիտական հանձնաժողովի կողմից՝ ԵԱՀԿ երևանյան գրասենյակի և ԱՄՆ ՄԶԳ Հայաստանի Ազգային ժողովին աջակցման ծրագրի հետ համագործակցությամբ:

Սահամանադրական բարեփոխումների հիմքում դրվում է հետևյալ հիմնարար սկզբունքը՝ համաձայն որի. Մարդը, նրա արժանապատվությունը, հիմնական իրավունքները և ազատությունները պետության կողմից ճանաչելով որպես բարձրագույն արժեք՝ պետք է պայմանավորեն իրավունքի գերակայության սկզբունքի անշեղ իրացումը և երաշխավորեն իրավունքով իշխանության սահմանափակումը: