2 րոպեի ընթերցում
ԵՐԵՎԱՆ, 17 ԱՊՐԻԼԻ, ԱՐՄԵՆՊՐԵՍ: ՀՀ Նախագահ Սերժ Սարգսյանն ընդունել է Twitter սոցիալական ցանցի փոխնախագահ Րաֆֆի Գրիգորյանին: Նախագահական նստավայրում հանդիպումից հետո Twitter-ի փոխնախագահն իր եւ ՀՀ Նախագահի` հեռախոսով ինքնանկարն է արել (սելֆի). այդ մասին վկայող լուսանկարը հրապարակել է նախագահի մամուլի քարտուղար Արման Սաղաթելյանը հենց թվիթերում:
Ավելի ուշ Գրիգորյանն իր միկրոբլոգում ավելացրել է սելֆին ու նշել, որ նախագահի համար թվիթերում պետք է հաշիվ բացել:
Րաֆֆի Գրիգորյանը Հայաստանում է«Թումո»-ում վարելու ծրագրավորման առաջադեմ դասընթաց` համալսարանի ուսանողներին և ՏՏ ոլորտի մասնագետների համար: Րաֆֆի Գրիգորյանն առաջին անգամ «Թումո» ստեղծարար տեխնոլոգիաների կենտրոն է այցելել2012 թվականին:
Որպես Twitter-ի` տեղեկատվական տեխնոլոգիաների ոլորտի առաջնորդ՝ Գրիգորյանը ղեկավարել է ընկերության ծառայությունների ինտեգրումը Apple-ի iOS մոբայլ համակարգին եւ օգնել ստեղծելու գեոլոկացիոն ծրագիրը: Այսօր նա ընկերությունում ղեկավարում է ավելի քան հինգ տարբեր խմբեր եւ պատասխանատու է սոցիալական ցանցի ծրագրային ենթակառույցների համար: Նախքան Twitter-ին միանալը, Գրիգորյանը համահիմնադրել է WattzOn.com-ը՝ ստարտափ ընկերությունը, որը Business Week ամսագիրն անվանել էր 2008թ. լավագույն գաղափար: Նա դասավանդել է Նյու Յորքի համալսարանի Ինտերակտիվ հեռահաղորդակցության բաժնում, ինչպես նաև O'Reilly Media-ի հրատարակած "TiVo Hacks" գրքի հեղինակն է և Մասաչուսեթսի տեխնոլոգիական ինստիտուտի «Մեդիա լաբ»-ի նախկին անդամը: