2 րոպեի ընթերցում
ԳԱՎԱՌ, 10 ՄԱՐՏԻ, ԱՐՄԵՆՊՐԵՍ: Գեղարքունիքի մարզի Գետիկ գյուղն աստիճանաբար հանրաճանաչ է դառնում օտարերկրյա զբոսաշրջիկների համար, ովքեր արդեն իրենց այցերով եւ հետաքրքրությամբ հող են նախապատրաստել` այստեղ զբոսաշրջությանը զարկ տալու նպատակով: Ինչպես «Արմենպրես»-ին տեղեկացրեց Գետիկի գյուղապետ Սարգիս Այունցը, նախորդ տարի Գետիկ են այցելել շվեյցարացի ավելի քան 60 զբոսաշրջիկ եւ 6 շնչից բաղկացած 1 գերմանացի ընտանիք, ովքեր օրեր շարունակ գիշերել են գհետիկցիների հարկի տակ, վայելել Գետիկի ձորի բնության շռայլությունները, հայկական խոհանոցը, հյուրասիրությունը:
Գետիկում զբոսաշրջության զարգացումը խթանում է լեհական ագրոտուրիստական կազմակերպությունը, որն արդեն «Միլենիում» կրթամշակութային հասարակական կազմակերպության հետ համագործակցությամբ նշանակալի քայլեր կատարել է` միջազգային շուկայում գովազդելով Գետիկի գրավչությունները, գյուղ հրավիրելով տուրիստական խմբեր ու տուրիզմի առանձին սիրահարների: Առայժմ տուրիստներին ընդունելու համար կազմակերպությունը հաշվառել է ինը բնակարաններ, որոնք միջազգային չափանիշներով կարող են ընդունել արտասահմանցի տուրիստներին: Նրանց մուտքը նախորդ երկու տարվա ընթացքում գյուղում խթանել է նաեւ անասնապահության եւ գորգագործության զարգացումը:
Գորգագործությամբ այժմ Գետիկում զբաղված են ութ ընտանիք, որոնց ձեռագործ գորգերը արտահանում եւ վաճառում է «Հայ միասնության խաչ» կազմակերպությունը: Զբոսաշրջիկների հոսքը Գետիկ կսկսվի մայիս ամսից: