ԵՐԵՎԱՆ, 24 ՓԵՏՐՎԱՐԻ, ԱՐՄԵՆՊՐԵՍ: «Հայաստան» հրատարակչությունը շուտով լույս կընծայի սփյուքահայ գրող Մովսես Պչաքճյանի «Երկերի լիակատար ժողովածու» գրքի չորրորդ հատորը: Ռալֆ Յիրիկյանի աջակցությամբ հրատարակած գիրքն ափոփում է հեղինակի` տարբեր տարիներին գրած բազմաթիվ գործեր: Գրքի նախորդ հատորների խմբագրական խորհրդի անդամ է եղել նաև ՀՀ գրողների միության նախկին նախագահ երջանկահիշատակ Լևոն Անանյանը:
«Շատ վաղուղ եմ ծանոթացել Լևոն Անանյանի հետ: Միասին եղել ենք տարբեր տեղերում, ճաշել ենք իրար հետ, զանազան գործեր ենք արել, այցելել ենք Լոռի ու Ծաղկաձոր: Անշուշտ, ծանր էր նրա կորուստը: «Երկերի լիակատար ժողովածու»-ի երրորդ հատորում մի լուսանկար կա, որտեղ ես և նա պատկերված ենք իրար կողք-կողքի»,-«Արմենպրես» -ի թղթակցի հետ զրույցում վերհիշեց Մովսես Պչաքճյանը:
Պչաքճյանը նշում է, որ հատորները բացմաթիվ նյութեր են պարունակում: Վերհիշում է` գրել սկսել է 30 տարեկանից: 1995-ից սկսած հեղինակն ընդհանրապես չի գրում` առողջական խնդիրների պատճառով:
«Գրել եմ սիրային, հայրենասիրական թեմաներով ստեղծագործություններ: Արդեն բավ է: Զանազան հարցերի եմ անդրադարձել: Սփյուքի շատ թերթերում եմ աշխատել` Հալեպի «Արևելքում», Բեյրութի «Այգ» և «Բագին» ամսագրերում, Փարիզի «Հառաջ»-ում, Բոսթոնի «Հայրենիքում» և Մոնրեալի «Հորիզոնում»: «Հառաջ»- ում աշխատել եմ 15 տարուց ավելի: Առաջին էջում էին տպագրվում գործերս»,-հավելեց Պչաքճյանը:
Սփյուռքահայ գրողը երեք տասնամյակից ավելի բնակվում է Փարիզում: Այստեղ է հայտնվել պատահաբար: Որոշել էր 21 օր մնալ քաղաքում, սակայն մնաց 38 տարի: Փարիզում 20 տարի եղել է տեղի հայկական մայր եկեղեցու դիվանապետը:
«Մի առիթով ասել եմ. «Երևանին քիչ մը Փարիզ կպակասի, Փարիզին` ամբողջ Երևանը»: Հայաստանի մասին միշտ գրել եմ: Փարիզում կարդում են իմ գործերը, նույնիսկ մրցանակներ եմ շահել: Այնտեղ հետաքրքրվում են հայկական մշակույթով, բայց, ցավոք, կամաց-կամաց ընթերցասիրությունը պակասում է»,- փաստեց հեղինակը:
Ամեն անգամ գիրք հրատարակելիս Մովսես Պչաքճյանը չի մոռանում նաև քննադատությունների մասին: Դրանք մշտապես զետեղում է իր գրքերում: «Երկերի լիակատար ժողովածուի» չորրորդ հատորն էլ բացառություն չի լինի: Այս գրքում ևս ներառված են լինելու այլ հեղինակների կարծիքները գրողի ստեղծագործությունների մասին:
Մովսես Պչաքճյանը ծնվել է Հալեպում 1940 թվականին: Ստեղծագործություններ ունի ամենատարբեր ժանրերով` վեպ, վիպակ, պատմվածք, էսսե, թատրերգություն, հրապարակախոսական և լրագրական հոդվածներ, բանաստեղծություններ, թարգմանություններ: 1976-ից բնակվում է Փարիզում, մասնակցում է հայկական գաղթօջախների գրական, թատերական և մշակութային կյանքին: 2009-ին ՀՀ նախագահ Սերժ Սարգսյանը Պչաքճյանին շնորհել է «Մովսես Խորենացի» շքանշան: Զբաղվում է նաև ուսուցչությամբ: