Համաշխարհային ռոք հիթերը՝ փողային նվագախմբի մատուցմամբ. Գյումրիի փողային նվագախումբը հանդես եկավ բացառիկ համերգով
3 րոպեի ընթերցում
![Համաշխարհային ռոք հիթերը՝ փողային նվագախմբի մատուցմամբ. Գյումրիի փողային նվագախումբը հանդես եկավ բացառիկ համերգով](http://armenpress.am/resized/480/storage/images/articles/2024/06/29/BWfloMMRIqXYAt5LUoTvzeQx3CCN0nXwW3wkW7Em.webp)
ԳՅՈՒՄՐԻ, 29 ՀՈՒՆԻՍԻ, ԱՐՄԵՆՊՐԵՍ: Գյումրիի դրամատիկական թատրոնում հունիս 28-ին բացառիկ համերգով հանդես եկավ համայնքային ենթակայության տակ գործող «Անի» փողային նվագախումբը։
Ինչպես տեղեկացնում է «Արմենպրես»-ը, համերգի ընթացքում հնչեցին համաշխարհային ռոք հիթերը փողային նվագախմբի և կիթառահար Վարդան Գաբոյանի մատուցմամբ՝ նվագախմբի դիրիժոր՝ Արտակ Գրիգորյան, գեղարվեստական ղեկավար՝ Արմեն Ձամուկաշվիլի, հրավիրյալ երաժիշտ՝ ալտահար՝ Լուսինե Խնկոյան, բաս-կիթառահար՝ Արթուր Մոլիտվին։
Հիսունամյա պատմություն ունեցող նվագախումբը վերջին շրջանում համալրել է իր նվագացանկը՝ փողային նվագախմբերի համար նախատեսված գործերից բացի հանդես է գալիս նաև ժամանակակից, սիրված ֆիլմերի, իսկ հիմա արդեն՝ ռոք հիթերով։
«Պետք է նախ շնորհակալություն հայտնենք նվագախմբի հիմնադիր՝ Գեորգի Ձամուկաշվիլիին՝ հիսուն տարի առաջ «հանդգնելու» ու այս նվագախումբը ունենալու ու այն մեզ հասցնելու համար։ Բարձր ծափեր նաև նվագախմբի երիտասարդացված կազմին։ Այն ամենը, ինչ կատարվեց վերջին մի քանի տարիների ընթացում` հեշտ ճանապարհ չէր, բայց, փաստորեն, հնարավոր էր՝ նոր երաժիշտների ընդգրկումից մինչև բացառիկ նվագացանկ, երիտասարդ դիրիժոր ու շատ սրտացավ տնօրեն»,-համերգի ավարտին նշեց Գյումրիի համայնքապետարանի մշակույթի և երիտասարդության հարցերի բաժնի պետ Լիլիթ Թովմասյանը՝ Արմեն Ձամուկաշվիլիին և Վարդան Գաբոյանին հանձնելով համայնքի ղեկավար Վարդգես Սամսոնյանի շնորհակալագիրը:
1973 թվականին ձևավորված նվագախումբը վերակազմավորվեց 1991-ին: Վերակազմավորված նվագախումբը նույն տարում մասնակցեց Փարիզում անցկացվող «Եվրոշեփոր» փառատոնին՝ վերադառնալով Գրան պրի մրցանակով: Այդ տարիներին փողային նվագախմբի ղեկավարը Գեորգի Ձամուկաշվիլին էր: Այսօր Գյումրու համայնքային ենթակայության տակ գործող «Անի» փողային նվագախումբը ղեկավարում է նրա որդին՝ Արմեն Ձամուկաշվիլին: Պահպանելով հին ու բարի ավանդույթները՝ երիտասարդ ղեկավարը փորձում է միևնույն ժամանակ նվագախմբին ժամանակակից շունչ տալ՝ այսուհետ նվագախումբը հանդես է գալու նաև նոր, ժամանակակից նվագացանկով՝ համաշխարհային հիթեր, ժամանակակից էստրադային, ջազային կատարումներ, սաունդթրեքներ, դասական գործեր:
Արմենուհի Մխոյան