Շիրակցի 300 դպրոցական այս տարի հանգիստը կանցկացնի Հանքավանում

ԳՅՈՒՄՐԻ, 1 ՀՈՒԼԻՍԻ,  ԱՐՄԵՆՊՐԵՍ: Շիրակի մարզի 300 դպրոցական այս տարի հանգիստը կանցկացնի Հանքավանի «Արագած» ճամբարում։ Դպրոցականների հանգիստը կազմակերպվելու է երկու հերթափոխով՝ 20-ական օրով: Հուլիսի 1-ին ճամբար է մեկնել երեխաների առաջին հերթափոխը` 190 դպրոցական:

Ինչպես «Արմենպրես»-ին տեղեկացրեցին Շիրակի մարզպետի աշխատակազմից, «Դպրոցականների ամառային հանգuտի կազմակերպում» պետական ծրագրով Հանքավանի «Արագած»  ճամբար մեկնող դպրոցականներին մարզպետարանի պատասխանատուները ճանապարհեցին Գյումրու Վարդանանց հրապարակից՝ մաղթելով ուրախ ու անմոռանալի հանգիստ։

ՀՀ կառավարության տրամադրած միջոցներով կազմակերպված ամառային հանգստի ծրագրում ընդգրկվել են սոցիալական տարբեր խմբերի պատկանող ընտանիքների 7-13 տարեկան դպրոցահասակ երեխաները։        

Արմենուհի Մխոյան