2 րոպեի ընթերցում
ԵՐԵՎԱՆ, 9 ՀՈՒՆՎԱՐԻ, ԱՐՄԵՆՊՐԵՍ: The Beautified Project հայկական անգլալեզու ռոք խումը հունվարի 25-ին Երևանի «Ուլիխանյան» ակումբում հանդես կգա ակուստիկ համերգով, որով խումբը կտոնի Վիեննայում, Բեռլինում և Փարիզում 2013 թվականի հոկտեմբերին տեղի ունեցած համերգային շրջագայության հաջողությունները: «Արմենպրես»-ի թղթակցի հետ զրույցում խմբի հիմնադիր Անդրե Սիմոյանը պատմեց, որ համերգի ընթացքում կհնչեն երգեր Behind The Happy Mask, Beyond The Butterfly և United We Fall ալբոմներից ակուստիկ տարբերակով, ինչպես նաև համերգի ներկաներին այլ անակնկալներ կսպասեն:
«Հոկտեմբերին մեկնարկած մեր այս համերգային շրջագայությունից հետո մենք դժգոհություններ էինք ստանում մեր ունկնդրից, որը ցանկանում էր մեզ նաև Երևանում լսել»,- նշեց Սիմոնյանը` հավելելով, որ ակուստիկ տարբերակով գործիքավորմամբ իրենց երգերը բազմիցս հնչել են եվրոպական շրջագայությունների ժամանակ, սակայն Երևանում դրանք կհնչեն առաջին անգամ:
Նրա խոսքով` բացառված չէ, որ համերգի տոմսերի սպառման դեպքում ևս մեկ ակումբային համերգ կտան նրանց համար, ովքեր տոմսեր չեն կարողանա ձեռք բերել այս միջոցառման համար: «Մենք ծրագրում ենք նաև մարտին մեծ համերգ տալ Երևանում»,- տեղեկացրեց խմբի հիմնադիրը:
Համերգասրահի ընտրության հարցում խումբը նախապատվություն է տալիս Հովհաննես Թումանյանի անվան պետականտիկնիկային թատրոնիդահլիճին, որի տեխնիկական և լուսային հնարավորությունները համապատասխանում են խմբի պահանջներին: «Քանի որ այս դահլիճում կան անհրաժեշտ տեխնիկական պայմաններ, դա հնարավորություն է տալիս չբերել հավելյալ տեխնիկա և չավելացնել համերգի տոմսերի արժեքը»,- պարզաբանեց երաժիշտը:
Հունվարի 25-ի համերգից հետո The Beautified Project-ը կգործարկի իր պաշտոնական նոր կայքը: Խումբը վերջին անգամ Երևանում համերգ է ունեցել 2013 թ. հոկտեմբերին:
The Beautified Project ռոք խումբը հիմնադրվել է 2005թ-ին, հայկական ամենաճանաչված խմբերից մեկն է, որի տեսահոլովակներն առաջինը ցուցադրվեցին MTV հեռուստաալիքի բրիտանական տարբերակով: