ԳՅՈՒՄՐԻ, 8 ՀՈՒՆՎԱՐԻ, ԱՐՄԵՆՊՐԵՍ: Շիրակի մարզում 2013 թվականին արտակագ պատահարների թիվն ավելացել է: Ինչպես «Արմենպրես»-ին տեղեկացրեց ՀՀ արտակարգ իրավիճակների նախարարության Շիրակի մարզի փրկարարական վարչության պետ Մարատ Սարիբեկյանը՝ դեպքերի թվի աճը կապված է ոչ թե այն բանի հետ, որ մարդիկ ավելի անզգույշ են դարձել, այլ փրկարարական ծառայության նկատմամբ վստահության մեծացման: Թեև մարզի փրկարարական վարչությունը դեռ չի ամփոփել 2013 թվականի ցուցանիշները, սակայն, նույնիսկ դեկտեմբերի 10-ի դրությամբ գրանցված 537 արտակարգ դեպքը գերազանցում է ամբողջ 2012թ.-ին արձանագրված 400 դեպքի ցուցանիշը:
Անցած տարի, ինչպես և միշտ, մեծ թիվ են կազմել տեխնածին բնույթի դեպքերը՝ 335 (հրդեհներ, մասնակի ինքնափլզում, վթարներ, պայթյուններ, Ճանապարհատրանսպորտային պատահարներ): 2012թ.-ին տեխնածին դեպքերը մարզում 315-ն էին: Եթե տեխնածին բնույթի դեպքերի թիվը ամեն տարի շատ չնչին փոփոխության է ենթարկվում, ապա տարերային բնույթի դեպքերը անցած տարի ավելի շատ են եղել՝ 2012թ.-ի 32-ի փոխարեն 85-ը: Սրանք հիմնականում ձնաբքերի հետևանքով գրանցված դեպքերն են: «Սա ոչ միայն այն պատճառով է, որ ձնաբքի դեպքերը 2013թ.-ին ավելի շատ էին, այլ փոխվել է հաշվառման կարգը. 2013 թվականից յուրաքանչյուր կանչ գրանցվում է որպես մեկ դեպք: Սա ավելի ճիշտ հաշվառում է, որն էլ պատճառ է, որ տարերային բնույթի դեպքերի թիվը աճել է. 19 դեպք 2012թ.-ին և 70-ը` 2013թ.-ին: Բացի այդ, 2013թ.-ին ունեցել ենք նաև կարկտահարության, հորդառատ անձրևների, քամիների դեպքեր: Անցած տարի աճել է նաև սոցիալ-կենցաղային դեպքերի թիվը»,- նշեց Մարատ Սարիբեկյանը:
2013թ.-ին շատ են եղել նաև օձի խայթոցի դեպքերը: Ի տարբերություն 2012թ.-ի, երբ ջրահեղձման դեպքեր չեն արձանագրվել, 2013թ.-ին այդ դեպքերը մարզում 3-ն էին: «Հաճախ մարդիկ, երբ համեմատում են արտակարգ դեպքերի թիվը, զարմանում են, որ ավելացել են արտակարգ պատահարները, բայց, կարող եմ ասել, որ դա փրկարար ծառայության հանդեպ վստահության բարձրացման արդյունքն է: Փրկարարների նկատամբ հավատն ավելի է մեծացել, և ժողովուրդը ցանկացած պատահարի դեպքում անպայման ահազանգում է 911» ,- վստահեցերց Մարատ Սարիբեկյանը: