2 րոպեի ընթերցում
ԵՐԵՎԱՆ, 9 ՀՈԿՏԵՄԲԵՐԻ, ԱՐՄԵՆՊՐԵՍ:ՀՀ Կառավարության և ՀՀ առևտրաարդյունաբերական պալատի բարձր հովանու ներքո «Երևան էքսպո» ցուցահանդեսային համալիրում կկայանա «Հայաստանը` Ձեր գործընկեր էքսպո 2013» 4-րդ տարածաշրջանային, բազմաբնույթ առևտրաարդյունաբերական ցուցահանդեսի բացումը։
Ինչպես «Արմենպրես»-ին տեղեկացրին ՀՀ առևտրաարդյունաբերական պալատի լրատվական ծառայությունից,«Հայաստանը` Ձեր գործընկեր 2013» ցուցահանդեսին մասնակցում են ինչպես հայրենական, այնպես էլ արտերկրի` ավելի քան 120 կազմակերպություններ` ներկայացնելով Ռուսաստանը, Վրաստանը, Պարսկաստանը, Սիրիան և այլ երկրներ:
Ցուցահանդեսի շրջանակում առաջին անգամ մեր երկրի ցուցահանդեսային պատմության մեջ կիրականացվի համտես-մրցույթ: Սննդաարդյունաբերության ոլորտի մասնակից ընկերությունները ներկայացնելու են իրենց արտադրանքը՝ առանց նշելու արտադրողի և ապրանքանիշի անունը: Այցելուները հնարավորություն կունենան համտեսել և անաչառ գնահատել իրենց դուր եկած մթերքը: Այնուհետև հատուկ համարներով համապատասխան թերթիկների վրա այցելուները կքվեարկեն: Ցուցահանդեսի ավարտին կամփոփվեն արդյունքները, և առավելագույն քվե ստացած մասնակիցը կարժանանա «Ժողովրդի ընտրություն» մրցանակին: Ցուցահանդեսի կազմակերպիչն է «Պրոմ էքսպո» ընկերությունը:
Թեմատիկ բաժիններն են` առողջապահություն, ապահովագրություն, արդյունաբերություն, առևտրային կազմակերպություններ, բանկեր և վարկային կազմակերպություններ, բեռնափոխադրում, զբոսաշրջություն, հանգստի և ժամանցի կենտրոններ, ինովացիոն և տեղեկատվական տեխնոլոգիա, իրավախորհրդատվական ծառայություն, կանաչապատում և ձևավորում, կահույք և կենցաղային տեխնիկա, շինարարություն և շին-տեխնոլոգիաներ, սննդարդյունաբերություն: