2 րոպեի ընթերցում
ԵՐԵՎԱՆ, 18 ՍԵՊՏԵՄԲԵՐԻ, ԱՐՄԵՆՊՐԵՍ։ ՀՀ փոխվարչապետ, տարածքային կառավարման նախարար Արմեն Գեւորգյանը հանդիպեց Բելառուսի Հանրապետության Մինսկի մարզի պատվիրակությանը` նահանգապետ Բորիս Բատուրայի գլխավորությամբ: «Արմենպրես»-ի հաղորդմամբ՝ ՀՀ տարածքային կառավարման նախարության հասարակայնության հետ կապերի բաժնից հայտնում են, որ պատվիրակությունը Հայաստանում է Սյունիքի և Վայոց ձորի մարզերի հետ համագործակցության հնարավորությունները քննարկելու նպատակով։ Պատվիրակությունը հանդիպումներ է ունեցել մարզային իշխանությունների հետ, ծանոթացել գործակցության ներուժին:
ՀՀ փոխվարչապետը ողջունել է համագործակցության նախաձեռնությունը` նշելով, որ ՀՀ կառավարությունը խրախուսում է ապակենտրոնացված մակարդակով հարաբերությունների խորացումը: Նա գոհունակություն է հայտնել Հայաստանի հետ ավանդական բարեկամական կապեր ունեցող Բելառուսի մարզերի հետ համագործակցության զարգացման կապակցությամբ:
Փոխվարչապետը տեղեկություններ է ներկայացրել Սյունիքի և Վայոց Ձորի մարզերի ներուժի, տեղերում իրականացվող մեծածավալ ծրագրերի մասին` նկատելով, որ երկու մարզերը հարուստ են նաև պատմամշակութային ժառանգությամբ ու զբոսաշրջային մեծ հնարավորություններ ունեն:
Հյուրերը տեղեկացրել են, որ արդեն նախանշել են համագործակցության որոշ նախագծեր, որոնք կարող են հաջողությամբ կյանքի կոչվել: Նրանք իրենց հայ գործընկերներին նույնպես հրավիրել են Բելառուս` համատեղ ծրագրերի իրականացման հնարավորությունները քննարկելու համար: Կողմերը հեռանկարային են համարում գյուղատնտեսության, արդյունաբերության, զբոսաշրջության ոլորտներում փոխգործակցությունը: