5 րոպեի ընթերցում
ԵՐԵՎԱՆ, 20 ՕԳՈՍՏՈՍԻ, ԱՐՄԵՆՊՐԵՍ: 2011 թվականին Չեխովի անվան թիվ 55 դպրոցում չորս ընկերներ հիմնեցին «Compass Band» ռոք խումբը և մեկ տարի անց` 2012-ին, մասնակցեցին «Մանկական Եվրատեսիլ» հեղինակավոր մրցույթին` գրավելով 3-րդ հորիզոնականը: Եվրատեսիլյան հաջողությունը ոգևորեց պատանիներին, և «Compass band»-ը վերջերս հանդես եկավ իր առաջին մենահամերգով: Դավիթ Պարոնիկյանը (վոկալ, բաս կիթառ), Արամ Ծատուրյանը (կիթառ), Աբրահամ Ազնաուրյանը (ստեղնաշարային գործիքներ) և Արշավիր Գրիգորյանը (հարվածային գործիքներ) «Արմենպրես»-ին պատմեցին իրենց տպավորությունների, ծրագրերի և նոր երգերի մասին:
-Օրերս դուք առաջին անգամ հանդես եկաք մենահամերգով: Ի՞նչ եք զգում ձեր առաջին մենահամերգից հետո:
Աբրահամ- Շատ ուրախ ենք: Սա մեր առաջին մենահամերգն էր, շնորհակալություն Արման Փահլևանյանին` այն կազմակերպելու համար: Դահլիճը լեփ-լեցուն էր:
Դավիթ- Ուրախ ենք, որ ելույթ ունեցանք հատկապես Stop Club-ում:Մեզ հյուր էին եկել Գոռ Սուջյանը և երաժիշտ` A Studio խմբից: Համերգին հնչեցին հայտնի ռոք երգերի cover տարբերակներ և մեր «Sweetie baby» երգը:
Արշավիր- Կարծում ենք` վատ չենք ելույթ ունեցել, բայց ավելի լավ կարող էր լինել: Երկու ամսից հավանաբար համերգ կունենանք, որտեղ կներկայացնենք մեր երգերը:
Արամ.- Մինչև ամսվա վերջ Ուլիխանյանում համերգով հանդես կգանք, բոլորին հրավիրում ենք այնտեղ: Համերգի վերջում Գոռ Սուջյանը, Արման Փահլևանյանը և A studio-ի հյուրը մեզ համար նվագեցին «Happy birthday, Compass band» երգը, շատ ուրախացանք:
-Այժմ ինչո՞վ եք զբաղված, ի՞նչ պլաններ ունեք:
Դավիթ- Հիմա պարապում ենք, ավելացնում մեր երաժշտական գիտելիքները և պատրաստում մեր սեփական երգերը:
-Պատրաստվու՞մ եք մոտ ժամանակներս նոր երգեր ներկայացնել հանդիսատեսի դատին:
Դավիթ.- Իհարկե, մտադիր ենք դրանք ներկայացնել 1-2 ամսից:
Արամ.- Այս տարվա «Մանկական Եվրատեսիլի» հայաստանյան նախընտրական փուլին ներկայանալու ենք նոր երգով` որպես հատուկ հյուր: Այժմ այդ երգն ենք փորձում:
Դավիթ.- Մինչև տարեվերջ նախատեսում ենք մի քանի սինգլների ձայնագրում, համերգներ, հաջողության դեպքում` տեսահոլովակ:
-Եվրատեսիլն ի՞նչ փոխեց յուրաքանչյուրիդ կյանքում:
Դավիթ- «Եվրատեսիլը» մեր կյանքին ուրիշ գույն տվեց, մենք տեսանք մեծ բեմ, հասկացանք, թե ինչ է նշանակում լիել պրոֆեսիոնալ:
Աբրահամ.-Վստահություն, փորձ և ճանաչում ձեռք բերեցինք և կայացանք որպես երաժիշտներ:
Արշավիր- «Եվրատեսիլի» շնորհիվ ծանոթացանք պրոֆեսիոնալ երաժիշտների, ռեժիսորների հետ: Մեզնով սկսեցին զբաղվել հայտնի երաժիշտներ:
Դավիթ- Նախորդ տարի դեկտեմբերի 4-ին «Deep Purple» խումբը համերգով ելույթ ունեցավ հենց նույն համերգասրահում, որտեղ «Եվրատեսիլն» էր անցկացվել: Ցավոք, մենք երկու օր առաջ վերադարձել էինք Հայաստան և բաց թողեցինք այդ համերգը: Եթե իմանայինք, որ նման բան կա, ամեն ինչ կանեինք, որ ներկա լիմեինք այդ հրաշալի համերգին: Իսկապես ափսոսում ենք, որ բաց թողեցինք այդ հնարավորությունը:
-Սեպտեմբերին ավագ դպրո՞ց եք գնալու: Արդեն կողմնորոշվե՞լ եք դպրոցի ընտրության հարցում:
Դավիթ- Ես ու Արշավիրը դպրոցի ընտրության հարցում դեռ չենք կողմնորոշվել: Երկու տարբերակ ունենք` կամ ընդունվել Չայկովսկու անվ. երաժշտական ուսումնարան, կամ էլ ինչ-որ ավագ դպրոց: Մեզ համար երաժշտությունն ամեն ինչ է, սակայն չի խագարի, եթե ինչ-որ այլ ասպարեզում պրոֆեսիոնալ լինենք:
-Ի՞նչ կմաղթեք ձեր հասակակիցներին, ովքեր ցանկություն ունեն ձեզ նման հաջողությունների հասնել:
Բոլորով- Որ հավատան իրենց ուժերին և վստահեն ինքներն իրենց: Ձգտեն հասնել բարձունքների: Շնորհակալություն ենք հայտնում մեր երկրպագուներին, հատկապես մեր դասարանի աղջիկներին, ովքեր միշտ մեր կողքին են եղել և աջակցել են մեզ:
Զրուցեց Ռոզա Գրիգորյանը
Լուսանկարները` Սամվել Բերքիբեքյանի