«Հայաստանի ձայնը» նախագծի մասնակիցների համերգը Գյումրիում անցել է լեփ-լեցուն դահլիճում

ԵՐԵՎԱՆ, 11 ՄԱՅԻՍԻ, ԱՐՄԵՆՊՐԵՍ: «Հայաստանի ձայնը» երաժշտական նախագծի բոլոր մասնակիցները մայիսի 10-ին մեծ համերգով հանդես ենեկելԳյումրիի` Վարդան Աճեմյանի անվան պետական դրամատիկական թատրոնում: Ինչպես«Արմենպրես»-ին տեղեկացրեց «Ջազը եւ Գյումրին» նախագծի համահիմնադիր Մկրտիչ Մանուկյանը, համերգն անցել է լեփ-լեցուն դահլիճում, ուղեկցվել է բուռն ծափահարություններով եւ հիանալի տրամադրությամբ:

Այն ամբողջովին եղել է կենդանի կատարմամբ:

«Հայաստանի ձայնը» նախագծի հաղթող էր ճանաչվել 18-ամյա Մերի (Մաշա) Մնջոյանը: Նախագծում երկրորդ տեղն է զբաղեցրել Նարեկ Մակարյանը:

Մնջոյանը ներկայացնելու է Հայաստանը հուլիսի 23-28-ը Յուրմալայում կայանալիք երիտասարդ կատարողների «Նոր Ալիք 2013» երգի մրցույթում:

Այս մեգանախագիծը մեկնարկել էր «Արմենիա» հեռուստաընկերության եթերում 2012 թվականի նոյեմբերից: Այն հանդիսանում է The Voice միջազգային երաժշտական նախագծի հայաստանյան տարբերակը: The Voice -ի ձեւաչափը մշակվել է hոլանդացի մեդիա- գործարար Ջոն դե Մոլին պատկանող Talpa Media ընկերության կողմից: Նախագիծը հաջողությամբ իրագործվել է եւ այժմ էլ պատրաստվում է հեռարձակման աշխարհի 45 երկրներում: Վերջերս այն իրականացվել է նաև Ռուսաստանի Առաջին ալիքով:

Համերգի կազմակերպիչներն էին Manukyan production-ը եւ «Արմենիա» հեռուստաընկերությունը: