2 րոպեի ընթերցում
ԵՐԵՎԱՆ, 2 ՄԱՐՏԻ, ԱՐՄԵՆՊՐԵՍ:«Եվրատեսիլ 2013» երգի միջազգային մրցույթում Հայաստանը ներկայացնող «Դորիանս» ռոք խմբի մեներգիչ Գոռ Սուջյանը կներկայացնի Lonely planet երգը: «Արմենպրես»-ի թղթակցի փոխանցմամբ` «Եվրատեսիլ 2013»-ի երգի ազգային ընտրությունը տեղի ունեցավ մարտի 2-ին Առաջին ալիքի ուղիղ եթերում: Երգի ընտրությունը կատարվեց ժյուրիի եւ հեռուստադիտողների քվեարկության հիման վրա` 50/50 հարաբերակցությամբ:
Ազգային ընտրության ընթացքում գեղարվեստական հանձնաժողովի կողմից ընտրված «Դորիանս» խմբի մեներգիչը հաջորդականությամբ կատարեց չորս` The truth, No time, Toy planet, Lonely planet երգերը, որոնց հեղինակների անունները գաղտնի էին մինչ ազգային ընտրության ավարտը:
Lonely planet երգի խոսքերի հեղինակը Վարդան Զադոյանն է, երաժշտությանը` անգլիական Black Sabbathռոք խմբի կիթառահարի Թոնի Այոմին:
Երգի ազգային ընտրությանը ելույթներ ունեցան Մալթայի եւ Վրաստանի ներկայացուցիչները: Մալթան «Եվրատեսիլ 2013»-ում կներկայացնի Ջանլուկա Բեզզինան (Gianluca Bezzina), Վրաստանը` Սոֆո Գելովանին եւ Նոդիկո Տատիշվիլին:
Համերգի ընթացքում համատեղ ելույթով հանդես եկան «Մանկական Եվրատեսիլ 2011»-ի հայաստանյան պատվիրակ Դալիթան, «Մանկական Եվրատեսիլ 2012»-ում Հայաստանը ներկայացրած Compass band-ը, ինչպես նաեւ «Դասական Եվրատեսիլ 2012-ում»-ի մեր մասնակից Նարեկ Կազազյանը: Նրանք կատարեցին Compass band-ի Swetie baby երգը` քանոնի նվագակցությամբ:
«Եվրատեսիլ 2013» միջազգային մրցույթի Հայաստանի մասնակցի երգի ազգային ընտրության հայտերի ընդունումն ավարտվել էր փետրվարի 20-ին: Հայտերի թիվը գերազանցել էր 70-ը: Հայտեր են ստացվել ոչ միայն Հայաստանից, այլեւ` Իսպանիայից, Բելգիայից, Շվեդիայից, Ֆրանսիայից:
«Եվրատեսիլ 2013»-ը տեղի կունենա մայիսի 14-18-ը Շվեդիայի Մալմյո քաղաքում:«Մենք մեկ ենք» կարգախոսի ներքո անցկացվող մրցույթին այս տարի կմասնակցի 39 երկիր: