Սերժ Սարգսյանը խոստացել է կյանքի կոչել մատչելի դեղերով ապահովման ծրագիրը

ԵՐԵՎԱՆ, 8 ՓԵՏՐՎԱՐԻ, ԱՐՄԵՆՊՐԵՍ: Ապահով Հայաստանի մասին իր պատկերացումները եւ դրան հասնելու ուղիները փետրվարի 8-ին Երեւանի Քանաքեռ-Զեյթուն վարչական շրջանի ընտրողներին ներկայացրեց ՀՀ նախագահի թեկնածու Սերժ Սարգսյանը:

«Արմենպրես»-ի փոխանցմամբ` նախագահի թեկնածուն կարեւորեց նման հանդիպումների անցկացումը եւ հավելեց, որ դրանք նոր լիցքեր են հաղորդում եւ հնարավորություն տալիս ծրագրի ամբողջականացման համար:

«Յուրաքանչյուր նման հանդիպման ժամանակ ես փորձում եմ ներկայացնել, խոսքս տեղ հասցնել որքան հնարավոր է պարզ, հակիրճ, բայց նաեւ որոշ դեպքերում մանրամասն` ամեն անգամ շեշտը դնելով որոշակի ոլորտի խնդիրների վրա: ՀՀ գյուղերում եւ քաղաքներում ես ներկայացնում եմ մեր արդեն իսկ ծրագրած նախաձեռնությունները բոլոր ասպարեզներում` պաշտպանությունից գիտություն, մշակույթից արդարադատություն: Չկա ոլորտ, որն ուղղակի կամ միջնորդավորված կերպով չառնչվի քաղաքացիների ապահովությանը. բարեփոխումները փոխադարձաբար լրացնում են միմյանց:Ապահով Հայաստանի գլխավոր նպատակը հայտնի է, իսկ ապահով Հայաստանի հենասյունը ապահով հայրենիքին է»,- ասաց Սերժ Սարգսյանը:

Նախագահի թեկնածուն Քանաքեռ-Զեյթունի ընտրողներին հիմնականում ծանոթացրեց առողջապահության ոլորտում նախատեսվող փոփոխությունների հետ: Նա կարեւորեց, որ մեր երկրի բոլոր համայնքների բնակիչները պետք է կարողանան օգտվել որակյալ բժշկական ծառայություններից: Նախատեսվում է ներդնել մայրական կապիտալի համակարգ, կատարելագործել առողջապահական ապպահովագրական ինստիտուտը: Կառուցվելու է միջազգային չափանիշերին համապատասխան արյունաբանության հիվանդանոց, հիմնվելու է ուռուցքաբանության կենտրոն:

«Մենք պարտավորվել ենք Հայաստանը դարձնել առողջապահության գերազանցության տարածաշրջանային կենտրոն: Առաջիկա երեք կամ չորս ամիսների ընթացքում մեր դեղատներում հայտնվելու են սոցիալական բաժիններ, որտեղ նույն որակի դեղերը լինելու են 30-35 տոկոսով ավելի էժան, քան ընդհանրապես կան»,- ասաց Սերժ Սարգսյանը:

Նա նաեւ կարեւորեց, որ իր կողմից հնչեցվող գաղափարները պարզունակ ցանկություններ կամ անհիմն թեզեր չեն: «Ընտրություններն ինչ-որ առումով երկրի, հասարակության համար փորձություններ են: Այսպիսի պահերին են առավել ցայտուն դրսեւորվում բոլորի ուժեղ ու թույլ կողմերը, նախընտրական բնական լարվածության տակ են ի հայտ գալիս երեւույթներ, որոնք սովորաբար քողարկված են: Բնական է, որ այս օրերին կարելի է ամեն ինչ տեսնել. ընդդիմադիրները փայտ են նետում իրար վրա` փորձելով պահել վաղուց արդեն կորցրած դիրքերը: Քաղաքական կուսակցությունը հալածում է իր անդամներին միայն նրա համար, որ սատարում են իրենց իսկ կուսակցության անդամին: Զավեշտալի բան է, բայց նախընտրական շրջանում շատ են լինում այդպիսի դեպքեր: Սա բնական է եւ ժամանակավոր: Շատ շուտով գալու է հանգիստ, առանց աղմուկի աշխատանքի ժամանակը: Մենք հետեւողականորեն առաջ ենք տանելու մեր երկիրը, հատ առ հատ լուծելու ենք բոլոր խնդիրները, արմատախիլ ենք անելու մեզանում առկա հոռի երեւույթները»,-շեշտեց Սերժ Սարգսյանը:

Հայաստանում փետրվարի 18-ին կայանալիք նախագահական ընտրությունների քվեարկությունն անցկացնելու նպատակով 41 ընտրատարածքներում արդեն ձեւավորվել է 1988 ընտրատեղամաս: Նախընտրական քարոզչությունը կավարտվի փետրվարի 16-ին: Քվեարկությունը կսկսվի փետրվարի 18-ին` ժամը 08:00-ին եւ կավարտվի 20:00-ին: Նախագահական ընտրությունների արդյունքների ամփոփումը տեղի կունենա 2013-ի փետրվարի 25-ին: