1 րոպեի ընթերցում
ԵՐԵՎԱՆ, 23 ՀՈՒՆՎԱՐԻ, ԱՐՄԵՆՊՐԵՍ: Հանրահայտ երգչուհի Բեյոնսեին մեղադրում են ԱՄՆ նախագահ Բարաք Օբամայի երդմնակալության արարողության ժամանակ Միացյալ Նահանգների օրհներգը ոչ կենդանի ձայնով կատարելու մեջ: Ինչպես տեղեկացնում է«Արմենպրես»-ը` վկայակոչելով Reuters գործակալությունը, երգչուհուն նվագակցող ծովային հետեւակի նվագախմբում նախ հաստատել են այդ տեղեկատվությունը, ինչից հետո հանդես են եկել հայտարարությամբ, որով հերքել են այդ լուրը:
Ինչպես նշվում է` նվագախբի անդամներից մեկը լրագրողներին հայտնել էր, որ ելույթից առաջ վերջին պահին երգչուհին օրհներգի «ֆոնոգրամա» տարբերակն է ձայնագրել ու ելույթի ժամանակ միայն նմանակել է:
Ապա նվագախումբը հանդես է եկել հայտարարությամբ, որում նշվում է, թե նվագախմբի ոչ մի անդամ լիազորված չէ դատել՝ երգչուհին կենդանի ձայնով է երգել, թե ոչ:
Երգչուհին այս մասին դեռ մեկնաբանություններ չի տվել:
Երկրորդ անգամ ԱՄՆ նախագահի պաշտոնում վերընտրված Բարաք Օբամայի երդմնակալության արարողությունը կայացել է հունվարի 21-ին: Երդման արարողությանը նախագահը ժամանել էր կնոջ եւ դստրերի հետ: Արարողության ժամանակ երկրի օրհներգը կատարել է աշխարհահռչակ երգչուհի Բեյոնսեն: