ՀՀ Նախագահ Սերժ Սարգսյանը կհանդիպի ՌԴ նախագահ Վլադիմիր Պուտինին

ԵՐԵՎԱՆ, 19 ԴԵԿՏԵՄԲԵՐԻ, ԱՐՄԵՆՊՐԵՍ: Հայաստանի Հանրապետության Նախագահ Սերժ Սարգսյանը դեկտեմբերի 19-ին Մոսկվայում հանդիպում կունենա Ռուսաստանի Դաշնության նախագահ Վլադիմիր Պուտինի հետ: Ինչպես հաղորդում է «Արմենպրես»-ը, այս մասին տեղեկացնում է ՌԻԱ-Նովոստին: ՌԴ նախագահը երկկողմ հանդիպումներ կունենա նաեւ Բելառուսի նախագահ Ալեքսանդր Լուկաշենկոյի եւ Ղազախստանի նախագահ Նուրսուլթան Նազարբաեւի հետ:

ՀՀ Նախագահ Սերժ Սարգսյանըդեկտեմբերի 18-ին աշխատանքային այցով մեկնել է Ռուսաստանի Դաշնություն՝ մասնակցելու դեկտեմբերի 19-ին Մոսկվայում կայանալիք Հավաքական անվտանգության պայմանագրի կազմակերպության Հավաքական անվտանգության խորհրդի նստաշրջանին:

Հավաքական անվտանգության խորհրդի կազմում են ՀԱՊԿ-ի անդամ պետությունների ղեկավարները՝ Հայաստանի նախագահ Սերժ Սարգսյանը, Բելառուսի նախագահ Ալեքսանդր Լուկաշենկոն, Ղազախստանի նախագահ Նուրսուլթան Նազարբաեւը (2012 թվականին ՀԱՊԿ-ի ՀԱԽ-ի նախագահ), Ղըրղզստանի նախագահ Ալմազբեկ Աթամբաեւը, Ռուսաստանի նախագահ Վլադիմիր Պուտինը, Տաջիկստանի նախագահ Էմոմալի Ռահմոնը, Ուզբեկստանի նախագահ Իսլամ Քարիմովը: