Ամերիկահայ համայնքի հանգանակության շնորհիվ Գեւորգյանների բազմանդամ ընտանիքը բնակարան ստացավ

ԳՅՈՒՄՐԻ, 14 ԴԵԿՏԵՄԲԵՐԻ, ԱՐՄԵՆՊՐԵՍ: Գյումրեցի Գեւորգյանների բազմանդամ ընտանիքը շուտով կտեղափոխվի նոր բնակարան: Գյումրու քաղաքապետ Սամվել Բալասանյանը դեկտեմբերի 13-ին բնակարանի բանալիները հանձնեց տնակում վարձով բնակվող Գեւորգյանների բազմանդամ ընտանիքին: Երկսենյականոց բնակարանը ձեռք է բերվել ամերիկահայ համայնքի հանգանակությունների շնորհիվ: Ինչպես «Արմենպրես»-ի թղթակցին տեղեկացրեց քաղաքապետի մամուլի պատասխանատու Զոհրապ Եգանյանը, 14 անձից բաղկացած ընտանիքի համար բնակարան է գնվել նորակառույց «Մուշ 2» թաղամասում:

Ընտանիքը երկրաշարժից անօթեւան չէր համարվում, քանի որ ստացել էր փոխհատուցում, որտեղ այժմ բնակվում է ընտանիքի հոր եղբայրը` իր ընտանիքով: Գեւորգյանները ստիպված էին վարձով բնակվել Գյումրիից բավական հեռու՝ Ազատան համայնքին պատկանող տարածքում տեղադրված տնակում: Ի դեպ, 11 անչափահաս երեխաներից ամենափոքրը երկու ամսական է: