Հայոց ցեղասպանության մասին պատմող «Վանա ծովուն արշալույսը» ֆիլմը ցուցադրվում է ԱՊՀ երկրներում

ԵՐԵՎԱՆ, 23 ՆՈՅԵՄԲԵՐԻ, ԱՐՄԵՆՊՐԵՍ: Հայոց ցեղասպանության մասին պատմող «Վանա ծովուն արշալույսը» ֆիլմը ցուցադրվել է Մինսկում, Կիևում, Դոնի Ռոստովում ու Կրասնոդարում: Ֆիլմն արժանացել է հայերի ամենաջերմ ընդունելությանը: Սփյուռքում հայապահպանության խնդիրների հարցադրումներ անող ֆիլմը նախաձեռնողների սպասածի պես խիստ հուզական ազդեցություն է ունեցել հանդիսատեսի վրա:«Արտերկրում ապրող մեր հայենակիցների ցանկությունից ելնելով ու գիտակցելով, որ «Վանա ծովուն արշալույսը» ֆիլմը ևս մեկ քայլ է ազգային ինքնագիտակցության պահպանման առումով՝ նախաձեռնեցինք կազմակերպել այս ծրագիրը»,- «Արմենպրես»-ին ասաց ցուցադրումների նախաձեռնող` Սփյուռքահայ ուսանողների խորհրդի նախագահ Սամվել Մկոյանը:

Ստեղծագործական խումբը՝ սցենարիստ Արմեն Վաթյանն ու ռեժիսոր Վահան Ստեփանյանը, ծրագրի շրջանակներում հանդիպումներ են ունեցել տեղի հայկական համայնքների ներկայացուցիչների, հայկական կազմակերպությունների հետ: Հայաստանից մեկնած պատվիրակությունն ամեն տեղ ջերմ ընդունելության է արժանացել: Քննարկվել են հիմնականում հայ համայնքների հետ համագործակցության ծրագրեր, ճշտվեցին հետագա անելիքները:

Ֆիլմի իրադարձությունները կրում են 1915թվականի ցեղասպանության հետեւանքները, ծավալվում Կարապետ Փամբուկչյանի ընտանիքում, որը ներկայացնում է Ամերիկա ներգաղթած հայերի չորորդ սերունդը եւ կանգնած է «Ամերիկա» կոչվող բազմազգ խառնարանում ընդհանուրին միաձուլվելու վտանգի եզրին. մի կողմից որդին, ով ըմբոստանում էր հոր ձեռնարկած արմատները պահպանելու փորձերի դեմ, մյուս կողմից թոռը, ով սիրահարվել էր թրքուհուն: Ութսունամյա Կարապետը, ում մայրը հրաշքով փրկվել էր եղեռնից, ձգտում էր ամեն կերպ իր օտարված որդու ու թոռան մեջ արթնացնել, ամրացնել կորուսյալ hայրենիքի հետ կապը, փրկել ընտանիքը օտարացումից ու բաժանումից: Կարապետ Փամբուկչյանի հույսն այս հարցում յուրաքանչյուր հայի արյան մեջ առկա գենետիկ հիշողությունն է, որը հնարավոր չէ սպանել կամ ջնջել` անկախ նրանից, թե որտեղ է ապրում հայը...

Նկարահանումները կատարվել են Հայաստանում, ԱՄՆ-ում, Ֆրանիսիայում եւ Արեւմտյան Հայաստանում: Գլխավոր դերերում նկարահանվել են տարբեր երկրներից հրավիրված դերասաններ` Ժան-Պիեռ Նշանյանը (ԱՄՆ), Արեն Վաթյանը (ՌԴ), Արեւիկ Մարտիրոսյանը (Ֆրանսիա) եւ Կարեն Ջանգիրյանը, ով կերտում է Կարապետ Փամբուկչյանի կերպարը: Առաջին անգամ հայկական ֆիլմում նկարահանվել է նաեւ թուրք դերասան. Գյունըշը Զանը մարմնավորել է Կարապետի թոռան ընկերուհուն, ով ֆիլմում եւս թրքուհի է: