2 րոպեի ընթերցում
ՍԵՎԱՆ, 21 ՆՈՅԵՄԲԵՐԻ, ԱՐՄԵՆՊՐԵՍ: Սևանում նոյեմբերի 20-նաշնանային զորակոչի առաջին օրն էր. բանակ էին ճանապարհում շուրջ երկու տասնյակ երիտասարդների:«Արմենպրես»-ի հաղորդմամբ` Սեւանի քաղաքապետ Ռուդիկ Ղուկասյանի նախաձեռնությամբ զորակոչի օրը վերածվել էր համաքաղաքային տոնի, որի մասնակիցները ոչ միայն բանակ զորակոչվողներն էին, նրանց ծնողներն ու հարազատները, այլեւ քաղաքի այլ բնակիչներ:
Տեր Ստեփանոս քահանա Իգնաթևոսյանի օրհնանքով, Տեր Նշան քահանա Սարգսյանի տերունական աղոթքով, մշակութային կենտրոնի տնօրեն Արամ Խաչատրյանի` մեր օրերի ու հայ ժողովրդի պատմական անցուդարձի վերապատմամբ, հայոց քաջազունների հիշատակությամբ սկսվեց արարողությունը:
Քաղաքապետ Ռուդիկ Ղուկասյանը բարեմաղթանք-ողջույններ հղեց օրվա հերոսներին: «Մեր տարածաշրջանի ամենամարտունակ բանակում ծառայելը պատիվ է, և այսօր դուք եք արժանացել դրան: Ես կիսում եմ ձեր ծնողների հուզմունքը, միաժամանակ հավատացած եմ, որ նրանք պետք է հպարտ լինեն հայոց բանակ որդի ճանապարհելու համար»,- ասաց քաղաքապետը:
Սևանի զինկոմ, փոխգնդապետ Աթայանը բարի ծառայություն մաղթեց տղաներին, ցանկանալով խաղաղ երկինք, պաշտպանված սահմաններ:Սևանի մշակութային կենտրոնի «Սևան» ժողովրդական պարերի համույթի սաներն էլ իրենց կրակոտ պարով հայրենասիրական լիցքեր հաղորդեցին ներկաներին:
Օրվա առթիվ քաղաքապետ Ղուկասյանը և զինկոմ Աթայանը պատրաստել էին նվերներ, իսկ Տեր Նշան Սարգսյանը նրանց հանձնեց աղոթագրքույկ:
Սևանի երաժշտական դպրոցի փողային նվագախումբը լրացրեց օրվա տրամադրությունը իր խրոխտ ու հայրենասիրական կատարումներով: