2 րոպեի ընթերցում
ԳՅՈՒՄՐԻ, 29 ՀՈԿՏԵՄԲԵՐ, ԱՐՄԵՆՊՐԵՍ: Վահրամաբերդում մշակույթի տուն է կառուցվում: Շինարարական աշխատանքները մեկնարկել են տարեսկզբին: Ինչպես«Արմենպրես»-ի թղթակցին տեղեկացրեց Շիրակի մարզպետարանի քաղաքաշինության վարչության պետ Ալբերտ Մարգարյանը, Վահրամաբերդի մշակույթի տան կառուցման ծրագիրը ՀՀ նախագահի նախընտրական խոստումներից վերջինն էր, որ երկրի նախագահն տվել էր Շիրակի մարզի բնակիչներին:
Կառույցի շինարարական աշխատանքերի համար նախագծա-նախահաշվային փաթեթն արդեն մեկ տարի առաջ պատրաստել էր Շիրակի մարզպետարանը: Ըստ նախահաշվի` շինարարության արժեքը 234 մլն դրամ է: Շենքը կառուցմամբ լուծվում է երկու խնդիր. համայնքը կունենա մշակույթի տուն, որից զրկված էր 1988 թվականից ի վեր եւ ոչնչացումից կփրկվի Մինասի հայտնի «Հայաստան» որմնանկարը, որն ըստ նախագածի կգտնվի նորակառույցում:«Երկրաշարժից հետո պահպանվել էր միայն որմնանկարի պատը: Նախագիծը պատվիրվեց այնպես, որ այդ որմնանկարով պատը պահպանվում է եւ դրա հիման վրա կառուցվում է նոր մշակույթի տուն: Աշխատանքներն ութսուն տոկոսով ավարտված են»,- նշեց Ա. Մարգարյանը:Մշակույթի տունը շահագործման կհանձնվի տարեվերջին:
Մինասի «Հայկական հովվերգություն» որմնանկարը եւս վերականգնվել է եւ Գյումրիի քաղաքապետարանի շենք է տեղափոխվում: Նկարչի ամենամեծ` «Հայկական հովվերգություն» որմնանկարը գտնվում էր Գյումրու «Քարմշակմեքենա» փակ բաժնետիրական ընկերության նախկին ճաշարանի շենքում: Այս տարվա ամռանը իտալացի վարպետների կողմից՝ Ֆաբրիցիո Յակոբինի գլխավորությամբ, սկսվեցին վերականգնման աշխատանքերը, որոնք իրականացվեցին երեք փուլով: