2 րոպեի ընթերցում
ԵՐԵՎԱՆ, 26 ՍԵՊՏԵՄԲԵՐԻ,ԱՐՄԵՆՊՐԵՍ: «Քանաքեռ-Զեյթուն» բժշկական կենտրոնն աճուրդի չի հանվի: Ինչպես «Արմենպրես»-ի հետ զրույցում ասաց Երևանի քաղաքապետարանի տեղեկատվության և հասարակայնության հետ կապերի վարչության աշխատակից Արթուր Սարուխանյանը, շրջանառվող լուրերն ապատեղեկատվություն են և չեն համապատասխանում իրականությանը:
Վերջերս լրատվամիջոցներում տեղեկություն էր տարածվել այն մասին, որ ՀՀ կառավարության որոշմամբ «Քանաքեռ-Զեյթուն» բժշկական կենտրոնը աճուրդի կհանվի: Նույնիսկ նշվում էին կենտրոնի հավանական գնորդների անունները, որոնց թվում էին` Սյունիքի մարզպետ Սուրիկ Խաչատրյանը, ՀՀ կառավարությանն առընթեր անշարժ գույքի կադաստրի պետական կոմիտեի նախագահ Երվանդ Զախարյանը և «Բարգավաճ Հայաստան» կուսակցության ղեկավար Գագիկ Ծառուկյանը:
«Քանաքեռ-Զեյթուն» բժշկական կենտրոնը ստեղծվել է 2003 թվականին 8-րդ «Բուժմիավորում» ՓԲԸ բազայի վրա: Կենտրոնում գործում են թերապիայի, էնդոկրինոլոգիայի, նյարդաբանության, ընդհանուր վիւաբուժության, դիմածնոտային վիրաբուժության, պլաստիկ վերականգնողական և միկրովիրաբուժության, գինեկոլոգիայի, ակնաբուժության, անեսթեզիոլոգիայի և վերակենդանացման բաժանմունքները, ուրոլոգիայի և անդրոլոգիայի կենտրոնը, ծննդատունը: