2 րոպեի ընթերցում
ԵՐԵՎԱՆ, 11 ՍԵՊՏԵՄԲԵՐԻ, ԱՐՄԵՆՊՐԵՍ: Զաքար Խաչատրյանի անհատական ցուցահանդեսը` նվիրված Հայկական պետական մանկավարժական համալսարանի հիմնադրման 90-ամյակին, տեղի ունեցավ Հայաստանի ազգային պատկերասրահում: «Արմենպրես»-ի փոխանցմամբ` ցուցահանդեսի բացման արարողության ընթացքում ՀՀ մշակույթի նախարար Հասմիկ Պողոսյանը գնահատում արեց, որ Արտաշես Հովսեփյան եւ Զաքար Խաչատրյան անունները հզոր երեւույթներ են հայ մշակույթի պատմության մեջ:Նրա խոսքով` թեեւ ուշացումով, բայց ճիշտ պահին է սպասված ցուցահանդեսն իր դռները բացում այցելուների առջեւ:
«Պատկերասրահի տարբեր սրահներում կարելի է հանդիպել մեծ վարպետի ստեղծագործություններին, ես երախտապարտ եմ նման ուսուցիչ ունենալու համար», -ասաց Ազգային պատկերասրահի տնօրեն Փարավոն Միրզոյանը:
Նկարիչների միության նախագահ Կարեն Աղամյանն էլ նշեց, որ Հայաստանում նման նկարիչ ունենալը մեծ ուրախություն է:«Կեցցե այն նկարիչը, ով ավանդույթներ է պահպանում եւ չի ընկնում մոդայի հետեւից»,- ասաց Աղամյանը:
«Շատ հուզված եմ, հատկապես այն բանի համար, որ, որպես շնորհակալություն, իմ ցուցահանդեսը նվիրվել է համալսարանի 90-ամյակին»,-ասաց Հայաստանի եւ Ռուսաստանի վաստակավոր նկարիչԶաքար Խաչատրյանը:
Զաքար Խաչատրյանը ծնվել է 1924 թվականին Սիսիանի շրջանի Սառնակերտ գյուղում: 30-ականներին վերջին նա ավարտել է Գորիսի մանկավարժական ուսումնարանը: 1951 թվականին ընդունվել է Լենինգրադի Ռեպինի անվան գեղանկարչության, քանդակագործության եւ ճարտարապետության ինստիտուտ:1970-ականններից սկած, իսկ 1981-1992 թվականներին արդեն որպես ամբիոնի վարիչ դասավանդել է Հայկական պետական մանկավարժական համալսարանի գեղանկարչական բաժնում: