368.44
Ադրբեջանից հաքերային հարձակումների նոր ալիք է սպասվում
2 րոպեի ընթերցում
ԵՐԵՎԱՆ, 3 ՍԵՊՏԵՄԲԵՐԻ, ԱՐՄԵՆՊՐԵՍ: Ադրբեջանցի հաքերների ուշադրության կենտրոնում այժմ հայկական պաշտոնական, ինչպես նաեւ լրատվական կայքերն են. հավանական է, որ հարձակումների նոր ալիք կլինի: Ինչպես «Արմենպրես»-ի հետ զրույցում նշեց տեղեկատվական անվտանգության փորձագետ Սամվել Մարտիրոսյանը, ադրբեջանցիներն այժմ փորձում են ստեղծված «իրավիճակը շտկել» ինչ-որ կերպ: Չի բացառվում, որ նրանք փորձեն կոտրել նաեւ այլ կայքեր, որպեսզի աղմուկ բարձրացնեն:
Անդրադառնալով ադրբեջանցի հաքերների այն հայտարարությանը, թե իրենք «անակնկալներ են պատրաստել հայկական կայքերի համար», Սամվել Մարտիրոսյանը շեշտեց, որ հաքերային ոլորտում անակնկալներ չեն լինում: «Չի բացառվում, որ իրենք վարձած լինեն այլազգի հաքերների. հենց դա ի նկատի ունեցած լինեն անակնկալ ասելով»,- ասաց փորձագետը: Այժմ հայկական կողմն ակտիվորեն հակահարված չի տալիս. «անհրաժեշտ դասն արդեն տրված է»:
Սամվել Մարտիրոսյանը նաեւ դժվարացավ պատասխանել, թե որքան կտեւի կիբեր պատերազմը: Փոխարենը նա ընդգծեց, որ այժմ հայկական կայքերը բավականին պաշտպանված են:
Ավելի վաղ հայ հաքերները կոտրել են շուրջ 20 ադրբեջանական կայք, որից երկուսը` կառավարական, մեկը` նախագահի կայքերն են, ինչպես նաեւ առաջատար լրատվամիջոցների կայքեր: Կիբեր ոլորտում «փոխհրաձգությունը» շարունակվում է:
Բաժանորդագրվեք մեր ալիքին Telegram-ում