1 րոպեի ընթերցում
ԵՐԵՎԱՆ, 10 ՕԳՈՍՏՈՍԻ, ԱՐՄԵՆՊՐԵՍ: Հանրապետության մարզերի որոշ բուժհաստատությունների ներկա վիճակն անբավարար է: Ինչպես «Արմենպրես»-ին տեղեկացրեց Վայոց Ձորի մարզպետարանի մամլո ծառայության պատասխանատու Սոնա Մարկոսյանը, Վայոց ձոր կատարած այցի ժամանակ նման հայտարարություն է արել ՀՀ առողջապահության նախարար Դերենիկ Դումանյանը:
Նախարարի խոսքով`մարզային այցերից այնպիսի կարծիք է ձևավորվել, որ շատ խնդիրներ բոլոր մարզերի բուժհաստատությունների համար ընդհանուր են:«Մարզերի բուժհաստատությունների ներկա վիճակը` թե շենքային հարմարություններով ու հագեցվածությամբ, թե կառավարման տեսակետից, այսօր չեն կարող բավարարել:
Դումանյանն ընդգծել է, որ առկա խնդիրների լուծման ուղղությամբ մինչ այժմ արդեն իսկ որոշումներ են կայացվել, ֆինանսական հավելյալ հոսքեր են ուղղվել դեպի մարզեր: Այդուհանդերձ, նրա դիտարկմամբ, միայն լավ հագեցած նորակառույց հիվանդանոցները բավարար չեն մարզերի առողջապահական խնդիրները պատշաճ լուծելու համար:Անհրաժեշտ է պետության կողմից հատկացված ֆինանսական միջոցները ճիշտ կառավարել, ինչպես նաև բուժհաստատությունները համալրել անհրաժեշտ մասնագետներով: