2 րոպեի ընթերցում
ԳՅՈՒՄՐԻ, 3 ՕԳՈՍՏՈՍԻ, ԱՐՄԵՆՊՐԵՍ: Գյումրիում ուսանողներն իրենք են փորձում յուրովի հետաքրքիր դարձնել իրենց առօրյան:
«Ակտիվ ուսանողական շարժում» կազմակերպության եւ Շիրակի թեմի սոցիալ-կրթական կենտրոնի ակտիվ երիտասարդների ջանքերով իրականացվում է «Պարենք միասին» ծրագիրը: Ծրագրի շրջանակներում յուրաքանչյուր կիրակի Գյումրիի Սբ. Ամենափրկիչ եկեղեցու հարեւանությամբ պարուսույցի՝ «Հայկական զարդանախշեր» պարային համույթի գեղարվեստական ղեկավար Բագրատ Հովհաննիսյանի կողմից բոլոր ցանկացողների համար անցկացվում են ժողովրդական եւ ազգագրական պարերի բացօթյա դասընթացներ:
Դասընթացներն ուղեկցվում են տվյալ պարի ծագման, շարժումների առանձնահատկությունների եւ դրանց նշանակության ներկայացմամբ:
«Այս նախաձեռնությունը նպատակ ունի ոչ միայն ազգաբանակչությանը հաղորդակից դարձնել ազգային մշակույթին, այլ նաեւ ունի միասնակության գաղափար: Յուրաքանչյուր կիրակի երեկոյան բոլոր գյումրեցիներին մենք հրավիրում ենք միանալու եւ միասին պարելու: Ծրագիրը կշարունակվի այնքան, որքան թույլ կտան եղանակային պայմանները: Նախատեսում ենք նաեւ սովորեցնել այլ ազգերի պարեր» ,-«Արմենպրես»-ի թղթակցին տեղեկացրեց Շիրակի թեմի սոցիալ-կրթական կենտրոնի երիտասարդական բաժնի պատասխանատու Սարինե Ասատրյանը:
Ծրագրի շրջանակներում արդեն ներկայացվել են «Քոչարի» եւ «Էջմիածին» պարերը :