2 րոպեի ընթերցում
ԳՅՈՒՄՐԻ, 12 ՀՈՒԼԻՍԻ, ԱՐՄԵՆՊՐԵՍ: Գյումրու քաղաքապետ Վարդան Ղուկասյանն առաջադրվելու է առաջիկա ՏԻՄ ընտրություններին` որպես քաղաքապետի թեկնածու: «Արմենպրես»-ի թղթակցի հետ զրույցում այս մասին կրկին շեշտեց քաղաքապետի մամուլի խոսնակ Լիլիթ Աղեկյանը: «Ինչպես այսօր, այդպես էլ մինչեւ թեկնածուների առաջադրման վերջին օրը մենք կպնդենք Վարդան Ղուկասյանի առաջադրման փաստը: Մենք չենք ընկրկելու եւ բացարձակ հիմքեր էլ չկան դրա համար: Ինչպես հայտարարել ենք, այդպես էլ հայտարարում ենք՝ գնում ենք ընտրությունների եւ գիտենք, որ մեր հետեւում կանգնած է ժողովուրդը, ով միշտ ընտրել է Վարդան Ղուկասյանին»,-նշեց Աղեկյանը: Այսքան տարիների ղեկավարումը փաստում է, որ նա ժողովրդական մարդ է, քաղաքը կառուցող, խնդիրներից չթաքնվող, խնդիրներն առաջ քաշող եւ լուծող:
Մամլո խոսնակը նաեւ ավելացրեց, որ քաղաքապետը դեռ անելիքներ ունի եւ ծրագրերը կիսատ չի թողնի: Խոսելով այս օրերին Վարդան Ղուկասյանի չառաջադրվելու վերաբերյալ մամուլում տեղ գտած տեղեկությունների մասին` Աղեկյանը նշեց, որ դա որոշ «պարապ» մարդկանց երեւակայության արդյունքն է: «Մեր՝ Ղուկասյանի թիմի արած գործն ակնառու է. 14 տարի գյումրեցիների վստահությունը շահած մարդը, ղեկավարելով քաղաքը, ինչպե՞ս կարող է չառաջադրել իր թեկնածությունը: Չգիտեմ դա ում պատվիրված տեղեկատվությունն է, որ պարբերաբար դրվում է շրջանառության մեջ, բայց միանշանակ է, որ գնալու ենք ընտրություններին»,-ասաց Աղեկյանը:
Որպես Գյումրու քաղաքապետի թեկնածու` շրջանառվում են մի քանի անուններ, եւ մամուլի քարտուղարը դա շատ բնական է համարում: «Շատ-շատերը հայտ կներկայացնեն կառուցված եւ վերածնված այս քաղաքն այժմ ղեկավարելու, բայց նաեւ այդ համատեքստում պետք է մտածել, որ այն մարդը, ով մեծ ջանքեր է գործադրել քաղաքը վերածնելու չի կարող չառաջադրվել եւ իր ծրագրերը վերջնական ավարտին չհասցնել»,-ավելացրեց Աղեկյանը:
Գյումրու քաղաքապետի ընտրությունները ծրագրված են սեպտեմբերին: